Italian nidominar sa Chigo AirCon Cycling

 CEBU, Philippines - Wala kaayo masuhito sa rota, apan ang  bisitang seklista gikan sa Italya nga si Christian Buttazzo maoy midominar sa labing unang Chigo AirCon Cycling Criterium sa miaging adlaw didto  sa  Mandaue City reclamation area.

 Si Buttazzo mitapos sa 36-kilometer, 15-lap criterium race sud sa usa ka oras, 20 minutos ug 13 segundos. Sila si Robert  Reyes ug Nestor Juntilla maoy mipahiluna sa ikaduha ug ikatulo nga dapit.

 Mokompleto sa top five finishers mao ang 66-anyos nga si Teodulfo Quilantang ug 65-anyos nga si Rogelio Basirgo.

 Ang double medalist sa Philippine National Games (PNG) nga si Ana Patricia 'Icamax' Maximo, 14-anyos sa SHS-Hijas napakyas pagdaog ug nalandig sa ikasiyam nga dapit.

 Gumikan sa kadaugan, si Buttazzo mosaka sa sunod nga higher category sa sunod nga leg sa Chigo Cycling series nga gisuportahan sa Cebu MultiSport. (BANAT NEWS)