PCCL title damgo sa UV Lancers

CEBU, Philippines -  Sukad sa iyang paglingkod isip head coach sa University of the Visayas (UV) Green Lancers duha na ka tuig ang milabay, si Felix 'Donbel' Belano Jr. adunay duha ka "goals" alang sa iyang koponan.

 Una mao ang short-term ug ikaduha ang long-term.

 Sa iyang ikatulong tuig uban sa UV Green Lancers, nakuha na ni Belano ang iyang gipangandoy nga short-term goal human niya giyahi ang koponan pagsakmit sa ika-10 nilang korona sa Cebu Schools Athletic Foundation Inc. (CESAFI) men's basketball.

 Samtang wala pa huwasi sa ilang makasaysayanong 64-62   nga kadaugan batok sa Southwestern University (SWU) Cobras sa deciding game sa ilang "best-of-five" finals, si Belano naghuna-huna na karon kalabot sa pagkab-ot sa ilang long-term goal ug walay lain mao ang paglangkat sa kampiyonato sa Philippine Collegiate Champions League (PCCL) karong tuiga.

 Lisud hinuon kini nga hagit gumikan kay ilang sangkaon ang mga labing maayo nga collegiate basketball sa Pilipinas, apan daku ang pagsalig si Belano sa ilang kahigayonan diin gikuhaan basi ang ilang matang sa duwa atol sa ilang pagpilde sa  Cobras.

 "I'm so happy and blessed that we have already accomplished our short-term goal at this stage and that is winning the CESAFI title,"  matud pa ni Belano. "Our next target is the PCCL championship. That's really our ultimate goal since I started coaching the UV Lancers two years."

 Ang UV  Green Lancers nakakuha og luna sa PCCL National Championships human mikampiyon sa 13th   CESAFI season. (BANAT NEWS)