Kagubot sa sports bisa'g asa moabot

Wala pa mahitabo dinhi sa Sugbu ang kisaw ug kontrobersiya sa nanghinapos nga 13th Cebu Schools Athletic Foundation Inc. (CESAFI). Daan nang dunay daghang mga panagbangi kalabot sa sports didto sa University Athletic Association of the Philippines (UAAP) ug sa Federation of School Sports of the Philippines (FESSAP).

Dili gyud mahitabo nga walay away ang bisan unsang matang sa bangga sa sports kay bisan gani ang atong mga National Sports Association (NSA) dunay sambog politika. Hasta pa man gani ang mga opisyales sa Philippine Olympic Committee (POC) ug Philippine Sports Commission (PSC) kanunay mabasol tungod sa dili maayo natong performance sa mga international competitions sama sa Southeast Asian Games (SEAG) ug sa Asian Games.

Tingali kining mga pagsaway ug pagbadlong ba hinuon niadtong mga hingtungdan ug mga masalaypon, makaayo ug makapausab sa dagan sa atong sports basta dili lang sab hisobraan.Gani hapit matag tuig kitang mosaway sa atong RP Team sulod na sa daghang katuigan, apan tungod sa kalampusan sa atong Smart Gilas-RP Team, mikatkat ang Pilipinas sa ika-11 nga pwesto sa world basketball rankings.

Dunay mga kasikas sa CESAFI kaniadto, apan ang gipaboran nga temporary restraining order (TRO) maoy pinakadaku ug pinaka-una sa kasaysayan sa Cebu sports. Ang uban milabay lang ug ang uban nahilum ra sab. Ang pag-ban sa CESAFI ni kanhi SWU Cobras guard Eliud Poligrates nga akong paisano sa Poro, Camotes island, usa sa labing dali hinumduman nga panghitabo. Ordinaryo lang kanang mga coaches ug mga players nga masuspenso human sa ilang ejection kay ang emosyon usahay dili man kapugngan ilabi na kun sikit kaayo ang duwa.

Nakakuha og TRO silang Danny ug Avah Michelle Aying, ang mga ginikanan ni Scott Aying sa University of San Carlos (USC) Baby Warriors kinsa wala tugoti nga makaduwa tungod sa residency rule. Ang maong TRO nga wala tahura ni Commissioner Felix O. Tiuikinhoy, Jr. maoy rason nganong nakanselar ang duha ka nahabiling duwa sa semifinals sa juniors division.

Dili pa lang sab dugay, ang assistant coach sa USC Warriors nga si Junthy Valenzuela, gi-ban sab sa nahabiling duwa sa season nga nakapalagot sa mga sakop sa USC Green and Gold Warriors nga naglakip ni head coach Julian Macoy ug Bogo City Mayor Celestino E. Martinez Jr. kay lagi sobra ra kuno kaayo ang maong silot.

Mitakod dinhi sa Sugbu ang TRO ug una nakong nabasahan ang maong kaso nga nahitabo didto sa nagpadayon nga UAAP Season 76 juniors action dihang gi-forfeit sa UAAP Board ang kadaugan sa University of the Philippines-Integrated School (UP-IS) tungod kay dili kwalipikado ang ilang usa ka player nga si Jozhua General.

Nahitabo kini niadtong Hulyo 14 dihang midaog ang UP-IS batok sa Adamson Baby Falcons, 89-87 pinaagi sa quadruple overtime didto sa Mall of Asia Arena. Ang maong kadaugan gihatag ngadto sa Adamson kay matud pa sa UAAP board nga misobra na ang lima ka tuig nga playing years. Apan ang tinuod diay nga rason, gikontrahan si General sa kanhi niya coach nga si Leo Pujante.

Ang mga teammates ni General nakadungog gyud nga giingnan ni Pujante si General nga "Hanggang 3rd year ka lang sa UAAP. Akala mo makakalaro ka next year?"

Ang nasuk-an ni coach Allan Gregorio mao nga giokihan ang rekord ni General sa Eligibility Committee ug giaprubahan sab sa Board, busa angay kuno unta nila kadto respetoan.

Apan ang pinaka-grabe gyud nga kontrobersiya sa sports mao ang pagpugong sa UAAP sa mga athletes/players sa pagsalmot sa laing torneyo ilabi na gyud sa FESSAP. Usa na niini ang kaso sa swimmer nga si Maria Claire Adorna.

* * *

MISCELLANEOUS. Belated birthday greetingso to USC Gold and Green Warriors president Nilo C. Velasquez last September 27. The guests include former Warriors Julian Macoy, Bogo City Mayor Celestino E. Martinez Jr., UC Dean of College of Law Atty. Baldomero C. Estenzo, Raul Reyes, Bobby Baria and Rajah Hotel F&B manager June Alipi. CESAFI commissioner Felix O. Tiukinhoy Jr. was also there. Cebu City Vice Mayor Edgar C. Labella. Cousin of Nilo and USC alumnus Frank Japson also joined the birthday bash as they all enjoyed the comedy and green jokes of emcee Sam Costanilla.