Jaguars midaog na

 CEBU, Philippines - Nabalikan sa ilang maayong duwa ang University of  San Jose-Recoletos (USJ-R) Jaguars ug mikutlo sa labing una nilang daog sa semifinals human ilang ma-upset ang University of San Carlos (USC) Warriors, 78-60 sa nagkainit nga aksiyon sa 13th  Cebu Schools Athletic Foundation Inc. (CESAFI) kagabii didto sa Cebu Coliseum.

 Ning pagsuwat,  padayon pa ang sangka sa topseed Southwestern University (SWU) Cobras batok sa University of the Visayas (UV) Green Lancers.

 Misaler ang "gamble" ni Jaguars coach Edito Salacut nga himuong outside shooter si Miguel Tabaloc, kansang posisyon mao ang  power forward.

 Gipangulohan ni Tabaloc ang Jaguars pinaagi sa iyang 19 puntos uban ang 10 ka rebounds.

 Si Tabaloc mao usab ang  nagpasiugda sa mainitong rally sa Jaguars uban ni Christian Parker sa fourth period aron molabaw og labing menos 23 puntos, 74-51 sa nahabiling  2:58  sa duwa.

 Si Parker miamot og 11 puntos, samtang sila si  Rendell Senining ug James Regalado miamot og 10 puntos matag usa alang sa Jaguars nga nagtangag og 1-4 nga  baraha sa semifinals ug nakigtabla sa ilang biktima.

 Nakatabang  sab sa ilang depensa si Wilkins Sanchez, kinsa mihimo’g mga crucial steals sa uwahing bahin sa fourth period.

 Ang USJ-R ug USC mao ra usab gihapon ang mag-ilog sa ikatulong puwesto,  apan daku kadtong maong bihaga alang sa Jaguars tungod kay aduna may duha ka Cameroonian imports ang Warriors nga silang Ahmed Salihou ug Barry Amin.

 Si Salihou maoy nangu sa Warriors nga mibugha og 17 puntos, gisundan ni Ian Ortega nga adunay 13 puntos.

 Walay nahimo si Stephen Que alang sa Warriors samtang si Victor Rabat igo lang mihimo'g singko puntos.