Adlawan misidlak sa Kopiko supercross-Iloilo leg
CEBU, Philippines - Mikadlit pagmaayo ang Sugbuanong rider nga si Jonjon Adlawan aron sakmiton ang pro open division title sa 8th leg sa Kopiko Astig 3-in-One Supercross Series sa miaging adlaw didto sa Barotac Nuevo, Iloilo.
Si Adlawan mipukan sa mga beteranong riders nga sila si Rhowell Mangusong IV ug RP No. 1 rider Glenn Aguilar nga mipuwesto sa ikaduha ug ikatulong dapit.
Sa wala pa siya misidlak didto sa Iloilo, si Adlawan midominar usab sa pro open division sa Dumaguete leg sa miaging Disyembre ug Tacloban leg niadtong Hunyo.
Mikompleto sa top five finishers sa pro open class mao ang laing Cebuano rider nga si Jubenile Abellar ug Ted Conde.
Namawi hinuon si Mangusong sa pro lite category human niya biyai si Aguilar alang sa titulo. Si Adlawan maoy third placer, samtang sila si Abellar ug Ambo Yapparcon maoy mikompleto sa top five.
Si Jacob Orbe maoy labing paspas sa open production, si Conde midaog sa intermediate division, si Christopher Bandigan sa beginners open, samtang si Felson Baculpo maoy naghari sa underbone class ug si Janelle Saulog sa women’s division.
Mokompleto sa lista sa mga midaog mao sila si Glenn Gaid (peewee 50cc), Ompong Gabriel (peewee 65cc), Pia Gabriel (mini), Jed Luna (local enduro), John Almerino (open enduro), Tristan Galanto (veteran C), Ayen Ledesma (veteran B) ug Irwin Lacnit (veteran A). (BANAT BALITA)
- Latest
