Suzuki-BMR riders mikadlit og daog sa RUGP series

 CEBU, Philippines - Sa katapusan, ang Suzuki-BMR Riders misumpo sa ilang demalas nga maoy tunok kanila ning tuiga sa Regional Underbone Grand Prix (RUGP) Series human sila mihakot og duha ka titulo ug ubay-ubay ka runner-up trophies atol sa Cebu leg ning bag-o lang didto sa Gaisano Bowlingplex grounds sa Banilad, ning siyudad.

 Ang bag-ong binatonan ni team manager/coach Bobby Mencia nga si Neil Perino mihatag og halandumon nga kadaugan sa koponan.

 Si Perino sa Lapu-Lapu City miugkat og duha ka titulo pinaagi sa 4AT beginners scooter 130 ug sa beginners 100-125.

 Naapsan ni Perino ang pambato sa Petron Bayawan nga si Enzo  Teves ug si Rodel Flores sa Insik Inside

paingon sa kalampusan sa beginners 100-125. Si Teves nalandig sa ikaduha, samtang si  Flores natugpa sa ikatulong dapit.

 Sukwahi sa 100-125, ang beginners 130 automatic sayon ra kaayo nga lumba alang ni Perino dihang siya ang nakakuha sa pole position sa pagsugod ug nakaangkon sa labing paspas nga lap time sa qualifying round. Wala siya molingi sukad niadto aron sakmiton ang kampiyonato batok ni  Teves.

 Ang banggiitang rider sa Suzuki-BMR nga si Mario Borbon mitapos sa iyang kampanya pinaagi sa

pagpahiluna sa ikaduha ug ikatulo nga dapit kortesiya sa expert 130 ug 4AT scooter open.

 Si Borbon maoy kinapaspasan sa expert automatic open paghuman sa qualifying stage aron maangkon ang pole post, apan napilde siya ni  Vingie Coloma sa Davao sa final lap nga nagtukmod kaniya ngadto sa ikatulo. Si Insik Flores sa Insik Inside miangkon sa ikaduha.

 Si Borbon ikaduha sab ngadto ni Chris Karlou Sanoga sa Suzuki-Vman Davao sa expert 130, samtang ang

teammate nga si Roland Ganotise mi-okupar sa ikatulo.

 Sa laing bahin, si John Louis Chan midaog sab og runner-up trophy alang sa Suzuki-BMR pinaagi sa novice 130 nga giharian ni Anver Antonio sa Suzuki Phoenix Vman, samtang laing rider gikan sa Davao nga si Verl Coloma miangkon sa ikatulo.

 Bisan pa  niana, si Coloma milangkat sa expert open title batok sa Japanese nga si Kimihiro Fujieda, samtang si April King Mascardo sa  Suzuki Phoenix Vman nalagpot sa ikatulo.

 Nakabawi hinuon si Mascardo pinaagi sa paghari sa 4AT intermediate expert ug sa inter-expert 130

categories.

 Gilangkat ni Mascardo ang 4AT inter-expert title human niya gipilde silang Rommel Paz ug Fitzgerald Sangual.

Nanghawod sab siya batok sa iyang teammate nga si Romeo Osigan sa inter-expert 130 division, samtang si Louie Vega sa JLV/C-Let Racing Team Mandaue mikapyot sa ikatulo. (BANAT PALARO)