Suzuki-BMR riders misalid sa Race of Champions

CEBU, Philippines - Nanghawod ang Suzuki-BMR riders sa Visayas leg sa 2013 National Motorcycle Race of Champions sa miaging adlaw didto sa Freedom Park sa Danao City.

 Gipangulohan kini ni Mario Borbon, kinsa midaog duha ka kampiyonato pinaagi sa expert 160 automatic ug expert 115 underbone divisions. Runner-up  usab siya sa expert 150 underbone category.

 Napuhalan ni Borbon ang kauban niyang Sugbuanon nga si Insik  Flores sa Yamaha Racing sa expert 160 automatic, samtang si Mark Capoy mi-okupar sa ikatulo.

 Si Borbon mipilde sab gihapon ni Flores ubos sa expert 115 underbone, samtang si Louie Vega sa JLV/Docs nalagpot sa ikatulo.

 Hinuon, si Borbon nasugamak ngadto ni Flores sa open 4-stroke race, samtang si Vega mipahiluna na sab sa ikatulong dapit.

 Laing duha ka Suzuki-BMR riders nga sila si John Louis Chan ug Jeffrey Tuico nakahatag sab og dungog ngadto sa ilang manager/coach Bobby Mencia ug sa sponsors dihang nahimo silang runner-ups sa tagsa-tagsa nilang dibisyon.

 Si Chan nalandig sa ikaduha  sa novice 125 superstock nga giharian ni RJ Commendador sa NCX Racing. Si Johniel Intas sa JLV-Docs napunta  sa ikatulo.

 Sa iyang bahin, si  Tuico mikapyot sa ikatulo  pinaagi sa novice 160 automatic.

 Ang top three finishers sa Visayas region kwalipikado na ngadto sa grand finals sa Septiyembre 21 didto sa kaulohan.