Noblefranca misaad og "knockout" nga kadaugan batok Porriento sa MMA showdown

CEBU, Philippines -  Nanganti ang Sugbuanong kickboxer Renante 'Limbas' Noblefranca nga mohimo'g "brutal knockout" nga kadaugan sa ikaduha niyang pagdepensa sa iyang Yaw-Yan Fighting Challenge (YFC) champion title batok ni Marjun 'Muma Warrior' Porriento sa Mindanao.

 Ang Noblefranca-Porriento match maoy special attraction sa "Ground and Pound 7: Resolution" Mixed Martial Arts (MMA) showdown karong Sabado sa gabii diha sa Cebu Coliseum.

 "Wa gyud ko'y hunong sa training ug nagtuo ko nga ready na ko para sa akong fight. Salig ko nga madepensaan ang akong bakus kay grabe akong ensayo. Gusto nako nga ma-knockout akong kontra og sayo," matud pa sa 22-anyos nga si Noblefranca kinsa nag-training ubos sa giya ni Yaw-Yan ArDigma Cebu CEO ug Founder Master Benigno 'Ekin' Caniga Jr.

 Si Noblefranca milampos sa  una niyang title defense niadtong Mayo 15 didto sa San Remigio human niya gipahagba sa first round si Arnel 'Ronin X' Ylanan sa Team Project X.

 Ning higayona, si Porriento na sab ang manimpad sa iyang suwerte batok ni Noblefranca.

 Ang maong MMA fight card bidahan ni Cebu-based British fighter Cris 'Lindol' Brook, kinsa makigharong sa taga-Davao nga si Lloyd Abucayan sa Beefit Pythons Pit alang sa bakanteng GPC heavyweight title. (BANAT NEWS)