Duna na gyu'y modaog

CEBU, Philippines -  Duha ka dinaog-daog nga teams University of Cebu (UC) Webmasters ug University of Southern Philippines Foundation (USPF) Panthers ang nagtinguhang mopakgang sa ilang tulo ka sunod-sunod nga daog sa dihang magbagat kini  sa 13th Cebu Schools Athletic Foundation Inc. (CESAFI) basketball event karong gabii  diha sa Cebu Coliseum.
 Sa dili pa ang engkuwentro sa Webmasters ug Panthers sa alas-6:45 sa gabii, ang University of the Visayas (UV) Baby Lancers (5-2) makigsangka batok sa Cebu Institute of  Technology-University (CIT-U) Wildkittens (3-3) sa ilang katapusang duwa sa elimination round uban ang paglaum nga makahimo'g usa ka impresibong kadaugan aron   mopahiluna sa ikatulong dapit nga maghatag kanila'g "twice-to-beat" advantage atol sa quarterfinals.
 Ang Webmasters ug Panthers parehong nagbitbit og 0-3 nga baraha, apan usa kanila ang makatagamtam sa una nilang daog karong gabii.  
 Pulos sab daghan og mga rookies ang duha ka  koponan busa walay bisan usa kanila nga makapangangkong lig-on.   Ang Webmasters adunay nahabiling  labing menos upat ka players nga niduwa sa miaging season ug mao sab ang Panthers   nga adunay susamang gidaghanon.
 Ang laing isyu nga ilang atubangon karon kun kinsa   kanila ang mas preparado.
 Ang Webmasters magsalig nilang  Jan Michael Auditor, Alexander Asis, Pompero Miranda III ug ang comebacking nga si Arvin Kim Gomez, samtang ang Panthers mosandig usab nilang Jomari Sollano, Art Camello, Lawrence Escanilla ug Jenrey Nudalo.
 Sa laing bahin, ang UV Green Lancers midaog  batok sa University of San Carlos (USC) Warriors sa iskor nga 77-63 sa ilang duwa niadtong Domingo.
 Napakgang sa Lancers ang 35-21 scoring run sa Warriors sa third period human kini nila biyai og 19 puntos   sa halftime, 33-14.
 Gihinay-hinayan sa Warriors og kitkit ang labaw  hangtod nga nakasikit kini, 51-54 human sa basket ni Dave  Guardiario.  Apan mibawos si Francisco Arong Jr. og usa ka three-pointer aron  inaton pagbalik ang labaw sa Lancers,  57-51 nga nakapahilom sa Warriors.
 Si Hernal 'Wowie' Escocio maoy nangu sa Lancers sa iyang 16 puntos, gisundan ni John Michael Abad nga adunay 12 puntos.
 Silang Miguel Plata ug Stephen Que maoy nangu sa Warriors sa ilang 15 ug 13 puntos matag usa,  samtang ang Cameroonian recruit nga si Ahmed Salihou miamot og 12 puntos.
PUNTOS MATAG USA
 UV (77) - Escocio 16, Abad 14, Perolino 10, Arong 9, Nzesseu 9, Akomo 7, Villamor 5, Marquez 3,
Cabañero 2, Codilla 1, Santillan 1
 USC (63) - Plata 15, Que 13, Salihou 12, Magat 7, Guardiario 6, Rabat 4, Amin 3, Ortega 2, Laude 2,  Pepito 2  (BANAT PALARO)