Warriors midaog
CEBU, Philippines - Midaog man tuod ang University of San Carlos (USC) Warriors apan nagsangkiig kini batok sa Cebu Institute of Technology-University (CIT-U) Wildcats, 73-68 niadtong Domingo sa seniors division sa nagpadayong 13th Cebu Schools Athletic Foundation Inc. (CESAFI) didto sa Cebu Coliseum.
Sa juniors division, ang Sacred Heart School-Ateneo de Cebu (SHS-AdC) Magis Eagles midagit sa ilang ikalimang daog human nila mabihag ang USC Baby Warriors sa iskor nga 64-59.
Lain pang mga resulta sa secondary matches, ang University of the Visayas (UV) Baby Lancers mibuntog sa University of Southern Philippines Foundation (USPF) Baby Panthers, 75-65 ug ang CIT-U Wildkittens mipukan sa UC Junior Webmasters sa iskor nga 84-75.
Nagtabla pa unta ang duwa sa katapusang 2:30 sa fourth period, 64-all human sa three-point ni John Graf, apan gisuklian sab dayon kini ni Stephen Que pinaagi sa iyang three-point play aron hatagan ang Warriors og 67-64 nga bentaha ug sukad niadto wala na makalabaw ang Wildcats.
Ang mga krusyal nga baskets ni Cameroon recruit Ahmed Salihou maoy yawi sa kadaugan sa Warriors nga nagbitbit karon og 1-1 nga baraha. Daku sab og natabang sa depensa sa ilawom si Barry Amin.
Si Salihou maoy nangu sa Warriors sa iyang 15 puntos uban ang pito ka rebounds, samtang si Que adunay 12 puntos ug si Ian Ortega nga miabuno'g 10 puntos.
Ang Wildcats gipangulohan ni Floyd Taboada nga miburak og 25 puntos, gisundan ni Franklyn Batiquin sa iyang 13 puntos ug Joshua dela Cerna nga adunay 12 puntos.
Sa laing bahin, ang defending champion Southwestern University (SWU) Cobras naglaraw pag-inat sa ilang sagunson nga daog ngadto sa upat ka duwa sa dihang sangkaon nila ang University of Cebu (UC) Webmasters sa seniors division.
Sugdan ang duwa sa alas-6:45 sa gabii human sa engkuwentro tali sa Cebu Institute of Technology-University (CIT-U) Wildkittens ug Don Bosco Technology Center (DBTC) Greywolves nga sugdan sa alas-5 sa hapon.
puntos matag usa
USC (73) - Salihou 15, Que 12, Ortega 10, Plata 9, Magat 7, Rabat 7, Seno 6, Laude 5, Amin 2
CIT-U (68) - Taboada 25, Batiquin 13, Dela Cerna 12, Menguito 6, Graf 5, Undaloc 3, Tabalin 2, Brigoli 2 (BANAT NEWS)
- Latest
