Dancesport qualifying event himuon karon
CEBU, Philippines - Himuon karong adlawa ang qualifying round alang sa 6th Dancesport sa Sugbu ug Queen City Dancesport Championship 2013 nga gikatakda sunod bulan diha sa Waterfront Cebu City Hotel and Casino.
Ang qualifying round anha himuon sa Cebu City Sports Center (CCSC).
Kining inter-school challenge alang kini sa mga atleta sa elementary, secondary ug tertiary.
Ang mga partisipante kinahanglan na-enroll sa eskwelahan diin sila nirepresentar, samtang kadtong buot nga morepresentar sa ilang barangay kinahanglan adunay "record of attendance" sa summer workshop nga gipasiugdahan sa DTCC.
Tugtan sab ang cross-barangay participants o makig-partner gikan sa laing kabarangayan kun sila makapakita og "letter of consent" gikan sa ilang tagsa-tagsang school coordinators o barangay o di ba SK chairman.
Kadtong wala makaapil sa bisan unsang workshops dili makasalmot sa kompetisyon.
Libre ang registration. Dugang pa niini, ang nag-unang unom ka parisan sa tanang kategoriya makakuha og luna alang sa dakung kalihukan sunod bulan.
Ang mga partisipante sa tanang eskwelahan mopasundayag sa tulo ka dance competition uban ang latin entries nga mosadsad sa samba, chachacha ug jive ug modern standard uban sa waltz, tango ug quickstep. (BANAT NEWS)
- Latest
