Alaska ironkids mosikad karon

CEBU, Philippines - Ang Alaska IronKids, ang local junior version sa international IronKids series, mosikad na karong alas-7 sa buntag didto sa Shangri-La's Mactan  Resort and  Spa sa dakbayan sa Lapu-Lapu.

 Dul-an sa 200 ka aspiring triathletes ang mopakita'g aksiyon sa maong kompetisyon ning tuiga nga gipaluyohan sa Alaska Milk Corporation.

 Si Tata Borlain, usa sa umaabot nga triathlon stars sa nasud, gilauman nga maglisud pagdepensa sa iyang korona sa 9-10 division tungod sa presensya ni Tahlia MacCormack, ang anak ni two-time world champion Chris 'Macca' McCormack.

 Mosalmot sab ang manghod ni Tahlia nga si Siena Lily, kinsa mopakita'g aksiyon sa 6-8 age division.

 Ang Cebu-based athletes mopakita usab sa ilang abilidad ning 3-in-1 nga paugnat sa kusog nga lakip na ang managsuong Uy nga sila si Craig Joshua, Shaia ug Syrah Ruth, ang managsuong Mataragnon nga sila si Aaliah ug Althea,

Nyke ug Nyko Archival, Ana Patricia Maximo, Nina Villaba, Yasmin Priagula ug ang mga entrante gikan sa  Cebu TriWarriors.

 Si Yuan Chiongbian, ang best Cebuano finisher sa miaging tuig, dili makaapil karon tungod sa personal nga rason.

 Ang mga partisipante sa 6-8 ug 9-10 categories mosubay sa 100-meter swim, 3-kilometer bike ug 1kilometer run, samtang ang 11-12 ug 13-14 divisions  mohimo sa mas taas nga distansya nga 300-meter swim, 10-kilometer bike ug 2-kilometer run.

 Ang langoy himuon sa kadagatan nga  nag-atubang sa  Shangri-La, ang biseklita sa Mactan Newtown sa

Punta Engaño ug ang dagan himuon sa five-star resort. (BANAT PALARO)