No. 1 si Appleton: Orcollo, Corteza pasok sa top 10 sa WPA rankings
MANILA, Philippines - Dalawang Filipino cue-artist ang nasa ikalawa at ikatlong puwesto sa men’s ranking ng international body sa bilyar na World Pool Association.
Si dating number one player Dennis Orcollo ay kumabig na ng kabuuang 1,308 puntos para kunin ang ikalawang puwesto, habang si Lee Van Corteza ang nasa ikatlo sa 1,245 puntos.
Dating nasa ikapitong puwesto si Orcollo pero kinapitan niya ang nakuhang 228 puntos sa paglaro sa China Open at 190 sa Ultimate 10-Ball para umangat ng puwesto.
Sa kabilang banda, umani si Corteza ng 600 puntos nang dominahin ang China Open para umakyat mula sa ikaanim na puwesto.
Si Darren Appleton ng Great Britain ang nasa unaÂhan sa talaan sa 1,876 puntos at kinatampukan ito ng 405 puntos sa Ultimate 10-Ball at 168 puntos sa China Open.
Nasa ikaapat na puwesto si Li Hewen ng China sa 1,215 habang si Ralf Souquet ng Germany ang kukumpleto sa unang limang puwesto sa 1,139 puntos.
Ang pambato sa kababaihan ng bansa na si Rubilen Amit ay nasa malayong ika-11 puwesto sa kababaihan sa naipong 790 puntos.,
Una sa talaan si Kelly Fisher ng Great Britain sa 1,646, habang ang mga Chinese players na sina Liu Sha Sha, Chen Siming at Fu Xiao-Fang ang nasa ikalawa hanggang ikaapat na puwesto sa 1,423, 1,405 at 1,328 puntos.
- Latest
