Roger Abella chessfest mosikad karon

CEBU, Philippines -  Dul-an sa 100 ka mga batan-on ug beteranong chess players ang magsangka sa pag-ulbo sa 1st Roger T.

Abella Memorial Open Chess Tournament karong adlawa diha sa E-Mall Activity Center.

 Ang FIDE-rated (International Chess Federation) event gihimo agi'g paghandom sa anhing Cebuano sportsman Roger T. Abella, kinsa aktibong mi-promote sa duwang chess ug scrabble sa buhi pa siya.

 Ang 7-round Swiss system competition nga bukas sa tanang magduduwa, mitagana og P21,000 nga ganting salapi nga ihatag ngadto sa top performers.

 Ang kampiyon mobulsa og P6,000, ang ikaduha makadawat og P4,000, samtang ang ikatulo makaangkon og P2,000.

 Mopahiluna gikan sa ikaupat ug ikalima makadawat og P1,000 ug P800 matag usa.

 Ang 6th hangtod sa 10th placers hatagan og P500 matag usa, samtang kadtong mo-okupar sa 11th hangtod sa 20th makadawat og consolation prize nga P300 matag usa.

 Ang top player sa kiddies, ladies, seniors ug 10-under categories makadawat og dugang premyo nga P500  matag usa.

 Aduna kini registration fee nga P200 alang sa open ug P100 sa kiddies ug ladies.

 Alang sa dugang mga kasayoran,  kontaka lang silang FIDE arbiters Marvin Y. Ruelan sa 0926-7352951 ug  Felix C. Poloyapoy Jr. sa 0933-6642958.

 Ang duha ka adlaw nga kompetisyon gipasiugdahan sa Four Central Squares Chess Association (FCSCA),

ang umbrella organization sa National Chess  Federation of the Philippines (NCFP) ug gipaluyohan sa Rose Pharmacy Inc. pinaagi ni chess patron Boogie Lim. (BANAT PALARO)