Tuburan Campaigners, DMS gisugat og daog sa 2013 Asturias Fiesta Cup

CEBU, Philippines -  Gisugat dayon og daog ang powerhouse Tuburan Campaigners sa pagsugod sa 2013 Asturias Open Fiesta Cup basketball tournament niadtong Sabado sa gabii didto sa Asturias covered court.

 Ang Tuburan Campaigners mipilde sa Balcon sa iskor nga 89-84 sa pagpangulo nilang Lusdoc ug Aguilar nga mihipos og 29 ug 21 puntos matag usa.

 Ang team owner sa Tuburan Campaigners nga si municipal mayor Democrito 'Aljun' Diamante misaksi sa duwa aron paghatag og moral support sa iyang mga batos.

 Sa laing aksiyon, ang  Dumdum Marine Services (DMS) Five milubong sa GN Bakeshoppe sa iskor  nga 119-95 alang sa ilang unang daog.

 Ang high-leaping sentinel gikan sa Lapu-Lapu City nga si Tarona maoy topscorer sa DMS  nga mipabuhagay og 33 puntos, samtang ang GN Bakeshoppe gipangulohan sab ni  Renato Demotor, kinsa miburak og 35 puntos, gisundan ni kanhi PBA stalwart Jimwell Torion nga miamot og 18 puntos.