CESAFI officials nagpa-drug test na

CEBU, Philippines -  Agi'g pagpakita nga seryoso sila sa  ilang     pag-implementar sa ground-breaking policy, ang mga kadagkuan sa Cebu Schools Athletic Foundation Inc.  (CESAFI) sa pagpangulo ni commissioner Felix 'Boy' O. Tiukinhoy Jr. miubos og "mandatory drug testing" kagahapon.
Gawas ni Tiukinhoy,  si technical committee chief Danny Duran, tanang CESAFI referees ug table officials ang gipaubos sab sa maong drug testing didto sa LH Prime Diagnostic Center sa A.S. Fortuna St. sa Mandaue City.
 Ang CESAFI mo-implementar og mandatory drug test sa tanang collegiate basketball players kinsa kuwalipikado mopakita'g aksiyon sa ika-13 nga season sa liga nga buksan sa  Agosto 3 diha sa Cebu Coliseum.
 Gihimo kini ni Tiukinhoy aron mapreserbar ang limpiyong imahen ug pagprotiher sa integridad sa liga.
 Dili angay maguol ang hintungdan eskuwelahan sa bayad sa maong proseso kay ang liga maoy mosagubang sa  aktwal nga galastuhon.
 Matud pa ni Tiukinhoy kadtong  positibo nga tiggamitan og mga ginadiling drogas pahamtangan og "indifinite suspension o dili ba i-ban sa tanang torneyo nga pasiugdahan sa CESAFI.
 Sa pagka karon, ang  CESAFI adunay 16 ka sporting disciplines ug usa na niini ang men's basketball event.
 Ang lain pang mga duwa naglakip sa  athletics, swimming, chess, gymnastics, lawn tennis, table tennis, sepak takraw, badminton, beach volley, volleyball, taekwondo, karatedo, football, dancesport ug scrabble. Ilakip sab sa

CESAFI ang golf ug weightlifting sa ilang kalendaryo sa mga duwa karong tuiga.
 Ang  CESAFI  adunay 12  ka miyembrong tunghaan ug  kini naglakip sa   Cebu Doctors' University (CDU), Cebu  Eastern  College (CEC), Cebu Institute of Technology-University (CIT-U), Don Bosco Technology Center

(DBTC), Sacred Heart School-Ateneo de Cebu (SHS-AdC),  Southwestern University  (SWU), University of Cebu

(UC), University of San Carlos (USC), University of San Jose-Recoletos (USJ-R), University of Southern Philippines-

Foundation (USPF), University of the Visayas (UV) ug Velez College (VC).   (BANAT PALARO)