Baby Warriors daog vs. Uv jrs. sa Sibonga

CEBU, Philippines - Duha ka krusyal nga three-pointers ni Scott Aying sa daginotong oras sa fourth quarter maoy nagsalbar sa University of San Carlos (USC) Baby Warriors ni coach Britt Carlo Reroma aron pakuratan ang University of the Visayas (UV) Baby Lancers sa iskor, 85-82 atol sa ilang tune-up game kaniadtong Sabado sa gabii didto sa lungsod sa Sibonga, Cebu.

Ubos sa paggiya ni Reroma, aduna na karoy 6-1 record ang Baby Warriors sa ilang tune-up games batok sa mga sakop sa Cebu Schools Athletic Foundation, Inc. (CESAFI) nga mopahigayon sa ilang 13th season karong Agosto 3 didto sa Cebu Coliseum.

Silang Juneau Antigua ug Clint Suelto maoy nangu sa opensa sa Baby Warriors sa ilang 24 ug 15 puntos matag usa samtang midugang si Aying ug 11 puntos.

Si Prince Canete maoy nangu sa Baby Lancers sa iyang 18 puntos samtang miamot og 15 ug 14 puntos matag usa silang John Escalona ug June Kent Manzo. Pareho sab mibahug og 13 puntos matag usa silang Ernesto Limitares ug Theo Fl;ores alang sa Baby Lancers.

Sa maong duwa, kanunay naglabaw ang Baby Warriors.

Kaniadtong miaging Sabado, midaug sab ang Baby Warriors batok sa Sacred Heart-Ateneo de Cebu sa ilang tune-up didto sa Cordova, Cebu ug dili pa lang sab dugay, ilang gilubong ang University of Southern Philippines-Foundation (USP-F) Baby Panthers didto sa USC-North campus gym niadtong Martes sa gabii.

Puntos matag usa:

USC (85) — J. Antigua 24, Suelto 15, Aying 11, Antigua 10, Malazarte 8, Baltazar 7, Ortega 4, Galinato 4, Ting 2.

UV (82) — Canete 18, Escalona 15, Manzo 14, Limitares 13, Flores 13, Oche 6, Diaz 3. (BANAT PALARO)