Paypa moaway na sa ALA-Cobra card
CEBU, Philippines - Pagkulit og laing daog maoy tumong ni Cebuano boxing prospect Jimmy Paypa (12-2, 4KOs) nga ipadayon sa iyang pakigsangka ni Christian Abila (9-11, 1KO) sa Manila sa main event sa ALA-Cobra Energy Drink:Tunay na Lakas Boxing karong gabii didto sa Bacolod Arts, Youth and Sports (BAYS) Center sa Bacolod City.
Ang 20-anyos nga si Paypa nga usa karon sa gipuntarya sa ALA Gym nga mahimong future star, mosuway pagkulit sa ika-11 niyang sunod-sunod nga kadaugan.
Si Paypa wala pa mapilde sukad niadtong tuig 2010 ug mihimo usab siya og impresibong kadaugan sa katapusan niyang away niadtong Abril human niya gipaluhod si Nikong Calamba.
Midaog usab si Paypa pinaagi sa "unanimous decision" batok sa beterano ug kanhi PABA champion Marvin Tampus niadtong Hunyo 20 didto sa Gaisano Countrymall.
Sa supporting main event, ang undefeated nga si Juren Labordo (9-0, 5 KO’s) makigsinukliay og kumo ni Philippines Boxing Federation (PBF) light flyweight contender Ricky Sabia (10-9-2, 5 KOs) sa Elorde Stable sa Metro Manila.
Ang garbo sa Bacolod ug kanhi amateur standout nga si Rolando Servania (3-0, 1KO) makigsangka ni Jonas Sultan (2-0, 1KO).
Mokompleto sa fight card mao ang away nila ni Romel Redondo batok Raul Yu, Alvin Sibugan batok Steve Recaborda, Lundon Castillo batok Junjesie Ibgos, Vonjeryl Gino batok Roniel Parcon ug John Rey Millegen batok Jemart Amlani. (BANAT NEWS)
- Latest
