Gibalhin ang binyu

CEBU, Philippines -  Gibalhin sa Mandaue City  Sports Commission (MCSC) ang binyu sa Doce Pares World Invitational and Eskrima Convention tungod sa "miscommunications" tali sa management sa J Centre Mall.

 Adto na kini himuon sa Mandaue City Cultural and Sports Complex.

 Ang tulo ka adlaw'ng torneyo nga gipaluyohan sa kagamhanan sa dakbayan sa Mandaue gitakdang sugdan karong Hulyo 25.

 Apan bisan pa niini, ang MCSC ubos sa ilang director Engr. Ricardo 'Gaga' Mendoza  naka-commit na nga

mohatag og labing nindot nga torneyo alang sa mga partisipante ilabi na sa mga langyaw'ng atleta gikan sa Reunion Island, France, Saudi Arabia, Australia, United States, Oman, United Kingdom ug South Korea.

 Nasayran, ang  kagamhanan sa dakbayan sa Mandaue milaslas og hapit katunga sa badyet sa maong torneyo.

 Ang Eskrima Convention sa Hulyo 26 nga gipaluyohan sa @ Home Massage, Cebu Zipline, Gervince Trading, Meadowland Developers Inc. maglatid kini sa nagkalain-laing Grandmasters ug Masters gikan sa nagkadaiyang eskrima ug arnis clubs. Ilang ipakita ang tagsa-tagsa nilang mga estilo ug sistema.

 Sa maong adlaw, himuon sab ang Sayaw o Forms competitions, samtang sa Hulyo 27 tigian ang Sparring titles.

 Alang sa mga lokal, magsangka kini sa lingkoranan sa National Team Training Pool nga bansayon alang sa Debrecen, Hungary World Eskrima Kali Arnis Championship sunod tuig.

 Niadtong Grandmasters ug Masters nga interesadong mosalmot sa Eskrima Convention, mahimong mokontak ni tournament ug convention director master Willy Bacalso sa 09228674700. (BANAT PALARO)