UP Maroons bokya gihapon

CEBU, Philippines - Midaug ang National University Bulldogs batok sa University of the Philippines Fighting Maroons sa iskor, 74-60 aron moabante sa ikaduhang pwesto sa nagpadayon nga UAAP Season 76 men’s basketball action didto sa Mall of Asia Arena.

Ang reigning two-time league MVP nga si Ray Parks mipakita sa iyang abilidad aron pangulohan ang Bulldogs sa iyang 18 puntos ug 14 niini pulos gikan sa free throw line.

Laing tulo niya ka teammates ang mibahug sab og labing menos 10 puntos alang sa NU kinsa mipabuhagay og 21 puntos didto sa fourth period diin ilang na-outscore ang Maroons.

Ang Bulldogs bag-o lang sab midaug batok sa University of Sto. Tomas Growling Tigers kaniadtong Miyerkules sa iskor, 71-67.

Tungod sa maong kadaugan, nagtabla na karon ang Bulldogs ug ang Growling Tigers sa ikaduhang pwesto sa parehong 3-1 win-loss mark.

Bugtong ang Far Eastern University Tamaraws maoy wala pay pilde sa collegiate division sa ilang 4-0 record.

Ang ace gunner sa Maroons nga si Sam Marata maoy nangu sa opensa sa iyang 14 puntos.

Ang Maroons wala gihapo'y daug sulod sa upat ka duwa.

Gawas kang Parks, misuporta sab sa opensa sa Bulldogs ang Cameroon import nga si Sean Mbe kinsa miposa og 15 puntos ug may 12 ka rebounds samtang ang guard nga si Joshua Alolino miamot og 12 puntos.