'Pinoy Pride XXI
PARAÑAQUE CITY — Milampos si Merlito 'Tiger' Sabillo (22-0, 12KOs) pagdepensa sa iyang WBO minimumweight title pinaagi sa usa ka impresibong ninth round knockout batok ni Colombian Jorle Jacinto Estrada (16-7, 5KOs) sa main-event sa 'Pinoy Pride XXI: When Worlds Collide' niadtong Sabado sa gabii didto sa Grand Ballroom of Solaire Casino and Leisure Park.
Ang 29-anyos mipamatuod nga usa siya sa mga banggiitang world champion sa nasud human siya milampos sa labing una niyang title defense.
Ang garbo sa Toboso, Negros Occidental mikonekta og usa ka bangis nga left uppercut ngadto sa gusok ni Estrada kinsa daling nalup-og sa 1:09 sa ninth round.
Migawas nga dominante ang abilidad ug kusug ni Sabillo ibabaw sa ring, apan nahasul ang Filipino champion human usab nagmakuli pakigsukmagay ang Colombian challenger kinsa nagpunay og atras ug dagan.
Dali hinuong nakahimu og adjustment si Sabillo ug migamit kini sa iyang body shots nga maoy nakapaluya sa Colombia.
Nahitabo ang perpektong katapusan sa ninth round dihang gigamit ni Sabillo ang iyang kaabtik sa paglihay sa right straight ni Estrada sa wala pa buhii ang counter left uppercut nga maoy mipukan sa Colombian nga wala na katubag sa ihap ni referee Raul Caiz Jr.
“Gusto gyud nako nga tumbahon siya (Estrada) og sayu pero sige man siya og dagan mao nang ako nalang sigehan og bira ang iyang lawas kay masakitan man sad siya,†matud pa ni Sabillo.
Sa iyang bahin, si ALA Promotions President Michael Aldeguer mibutyag nga sa Oktubre ang gitan-aw niyang nga maoy sunod petsa nga moaway si Sabillo nga giplanohan nga ipahigayun sa Mexico o Dubai.
Sa supporting bout, si ’King’ Arthur Villanueva (22-0, 12KOs) mipaundang usab ni Arturo ‘Fuerte’ Badillo (21-5, 19KOs) sa fourth round aron masakmit ang bakanteng WBO Asia-Pacific super flyweight title.
Midaog usab si former two-time world title challenger AJ ‘Bazooka’ Banal (29-2, 21KOs) kinsa yanung midemolis ni Mexican Abraham Gomez (18-8, 9KOs) sa second round.
Pabilin usab nga way pilde si ‘Prince’ Albert Pagara (17-0, 12KOs) human gipakatug sa second round ang Thai nga si Khunkiri Wor Wisaruth (9-5, 5KOs). (Lemuel P. Maglinte)
- Latest
