Altas rumesbak sa Pirates

Laro Bukas

(The Arena, San Juan)

4 p.m. JRU vs EAC

6 p.m. Mapua vs San Beda

MANILA, Philippines - Bumangon ang Altas mula sa isang masaklap na overtime loss para kunin ang kanilang ikatlong panalo.

Sumandig ang Perpe­tual Help kina import Nosa Omorogbe at Juneric Baloria sa fourth quarter para talunin ang Lyceum, 71-66, sa first round ng 89th NCAA men’s basketball tournament kahapon sa The Arena sa San Juan.

Nagtala si Omorogbe ng 19 points, 9 rebounds at 5 assists, habang umiskor si Baloria ng 18 points na tinampukan ng 3-of-5 shoo­ting sa three-point line para sa panalo ng Altas, nagmula sa 77-78 overtime loss sa San Sebastian Stags.

May 3-1 record ngayon ang Perpetual katabla ang three-time champions San Beda (3-1) sa ilalim ng Letran (3-0) kasunod ang Lyceum (2-2), San Sebastian (2-2), Jose Rizal (2-2), Arellano (1-2), Mapua (1-2), Emilio Aguinaldo College (1-3) at St. Benilde (0-3).

Nauna nang ipinoste ng Altas ang isang 13-point lead, 43-30, sa third period bago naagaw ng Pirates ang unahan, 55-53, sa 1:19 nito.

Muling naagaw ng Perpetual ang kalamangan sa 62-59 mula sa isang three-pointer ni Baloria patungo sa kanilang 67-61 bentahe sa 3:31 ng fourth quarter.

Sumandal naman ang Lyceum kina Shane Ko at Dexter Zamora upang ilapit ang laro sa 65-68 sa huling 1:23 nito.

Tatlong free throws ang isinalpak nina Scottie Thompson, Baloria at Omorogbe upang muling ilayo ang Altas sa 71-65 sa natitirang 15.9 segundo.

Perpetual 71 -- Omorogbe 19, Baloria 18, Alano 10, Thompson 9, Arboleda 8, Elopre 4, Bantayan 3, Oliveria 0, Dizon 0, Lucente 0, Jolangcob 0.

Lyceum 66 -- Zamora 13, Ko 11, Mbomiko 10, Azores 10, Baltazar 8, Francisco 5, Lesmoras 5, Ambohot 4, Mendoza 0, Evangelista 0, Taladua 0, Alanes 0.

Quarterscores: 19-14; 42-30; 55-55; 71-66.