UV-Phl napilde na sab sa 27th summer Universiade

 CEBU, Philippines - Nakatilaw sa  ikaupat nilang sunod-sunod nga kapildihan ang Philippine team, ning higayona batok sa Mongolia, 79-82 sa 27th Summer Universiade didto sa Kazan, Russia.

 Sukwahi sa ilang unang tulo ka duwa diin gimasaker kini sa two-time defending champion  Serbia, Romania ug Japan, ang RP Team nga girepresentahan sa University of the Visayas (UV) Green Lancers  mipakita og maayong labok ug mirehistro kini'g 6-0 nga bentaha luyo sa mga paningkamot nilang John Abad ug Hernal 'Wowie' Escocio.

 Dali hinuon   nahanaw ang labaw dihang ang Mongolians milusad og 17-6 run, apan ang UV-Phl mibawos pinaagi   sa 9-1 nga rally aron maangkon ang tres puntos nga labaw, 26-23  paghuman sa unang kuwarter.

 Nainat pa sa UV-Phl ang labaw ngadto sa sayes puntos, 29-23 sa  3-pointer ni Cris Perolino gikan sa assist ni Alfred Codilla, apan didto ra kutob ang  ilang maayong labok kay ang Mongolia milusad og makabungog nga 17-0 run aron makontrolar ang duwa.

 Human miposte og 47-38 sa halftime, giduwa-duwaan sa Mongolians ang UV-Phl sa nahabiling mga kuwarter. (BANAT PALARO)