Kampo ni Cuello miangal
CEBU, Philippines - Wa makauyon ang kampo ni Filipino boxer Denver Cuello sa majority decision nga kapildehan niini sa mga kamot ni WBC minimumweight champion Xiong Zhao Zhong sa China niadtong miaging adlaw didto sa World Trade Centre sa Dubai.
Ang manager ug trainer ni Cuello nga si Aljoe Jaro nagkanayon nga wala siya makasabot sa score sa mga hurado tungod kay nagtuo siya nga labaw sa puntos si Cuello tungod kay napatumba niini si Zhong sa first round.
Gawas pa niini, gikuhaan usab og uno punto ang Tsino human sa head butt niini ngadto ni Cuello sa ninth round.
“Cuello knocked him down in the first round and Zhong had a point deducted for the headbutt. So we can’t understand the result. It was a disgrace,†matud pa ni Jaro.
Nasayran nga gawas sa nagisi niya nga kilay, nakahiagum usab og bali sa bukton si Cuello nga maoy iyang gibasul og nganung wala na kaayo siya kapanumbag.
Human sa dose ka hugna sa away ang tulo ka mga hurado mihatag og 113-113, 115-112 ug113-110 pabor sa Tsino.
Tungod sa ilang reklamo, si Jaro gusto og hinanaling rematch tali sa duha, apan kinahanglan una nila nga atimanon ang bukton ni Cuello nga ipailawom sa usa ka operasyon. Si Jaro gusto nga sa hinapos nga bahin ning tuiga ipahigayun ang rematch. (BANAT PALARO)
- Latest
