Accenture, Aegis pabiling walay pilde sa CSCC E-League

CEBU, Philippines - Nagpabiling walay pilde ang Accenture Sharks ug Aegis Vipers sa 9th CSCC E-League basketball tournament niadtong Domingo didto sa City Sports Club-Cebu gym sa Cebu Business Park.

Ang Accenture nagsalig sa ilang kainit sa first period nga maoy gihimo nilang hinagiban pag-ihaw sa Lexmark Stallions, 58-50, samtang ang Aegis milubong sa Author Solutions Inc. (ASI) Hardbacks, 79-60.

Si Archie Brian Vincent Batua mipabuto og 16 puntos ug milangkat og pito ka rebounds, samtang si Ildefonso Bulangis Jr. miabuno'g 13 puntos alang sa  Accenture nga temporaryong nagsolo sa liderato sa  Southern Conference uban ang 3-0 win-loss record.

Mitikdol sab og 12 puntos si Ryan Edward Llanos uban ang upat ka assists alang sa Accenture nga milansang og 25-8 paghuman sa unang 10 minutos sa duwa.

Sa kalawom sa lubong, ang Lexmark wala na makarekober pa sukad niadto ug nahiagom sa ilang unang pilde.

Si Franco Angelo Cipriano maoy nangu sa Lexmark pinaagi sa iyang 17 puntos, gisundan ni Jake Pia sa iyang 14 puntos.

Sa laing bahin, sila si Rodolfo Enterina III, Dean Junber Escalon ug Ryan Veloso nagkumboya og 33 puntos aron gihayan ang Aegis pagkulit sa ilang ikaduhang sunod-sunod nga daog.

Ang Aegis maoy nagkontrolar sa duwa human moposte og 22-15 sa first quarter. Padayon nila nga girumbo ang ASI sa sunod nga duha ka kuwarter aron moabante og 21 puntos, 57-36 pagsugod sa final period.

Si Martin Ian de Guzman miburak og 13 puntos, samtang sila si Sergs Al Go Bui ug Jonas Panerio miamot og 12 puntos matag usa alang sa ASI nga nahiagom sa ilang ikatulong sunod-sunod nga pilde.

Sa lain pang duwa, ang Calltek Trojans midaog sab pinaagi sa pagpukan sa Stream Ingenyouity sa iskor nga 56-51.

Si Jan Pierre Gellez mipabuhagay og 17 puntos, samtang si Christian Judilla mitimbre og 14 puntos ug si Mark Louse Gellez mitikdol og 13 puntos alang sa Calltek nga miinat sa ilang baraha ngadto sa 2-1.

Ang one-time MVP nga si Sylvester Millevo ug Iven Cris dela Torre maoy nangu sa Stream nga adunay 11 puntos matag usa.

PUNTOS MATAG USA

Unang duwa:

ACCENTURE (58) - Batua 16, Bulangis 13, Llanos 12, Suerte 4, Jumao-as 4, Loreto 3, Abesia 3, Natavio

2, Bontes 1

LEXMARK (50) - Cipriano 17, Pia 14, Tiempo 5, Martinez 4, Talan 4, Ofonda 2, Divinagracia 2,

Villahermosa 2

Ikaduhang duwa:

AEGIS (79) - Enterina 12, Escalon 11, Veloso 10, Pastoral 8, Manzanares 8, S.W. Navaja 6, K.C. Navaja

6, Palmere 6, Alvarez 6, Bas 2, Yballe 2, Zanoria 2

ASI (60) - De Guzman 13, Go Bui 12, Panerio 12, Villarin 9, Misa 4, Go 4, Reyes 2, Mosquera 2, De Leon

2

Ikatulong duwa:

CALLTEK (56)  - J.P. gellez 17, Judilla 14, M.L. Gellez 13, Genebraldo 8, Julian 2, Magsanay 2

STREAM (51) - Millevo 12, Dela Torre 12, Mangubat 7, Polestico 6, Galicia 5, Alquilos 4, Aranda 4, Egay

3