Boksidor gipatay
CEBU, Philippines - Nakaplagan nga wala nay kinabuhi ang kanhi Mexican world title challenger ug gikasangka kaniadto ni ALA rising prospect Genesis Servania nga si Genaro 'Poblanito' Garcia niadtong Sabado didto sa Mexico.
Si Garcia misikat sa mga Pinoy fans human niya hatagi og kulbahinam nga sangka si Servania niadtong Hunyo 2 sa miaging tuig. Mipakita sa iyang kaisug ug abilidad si Garcia batok ni Servania, apan mipatigbabaw gihapon ang ALA boxer kinsa midaog pinaagi sa 12 round TKO aron masakmit ang WBC International super bantamweight title didto sa Manila.
Sa taho sa Philboxing.com, si ALA Promotions CEO Michael Aldeguer ug ALA chief trainer Edito Villamor pulos nakurat sa maong taho tungod usab kay nailhan nila nga usa ka maayong tawo si Garcia.
Ang Mexican boxer gihulagway ni Villamor nga usa ka isug nga boksidor ug aduna usab kini respeto sa iyang mga gikasangka ibabaw sa ring nga nakita human sa sangka nila ni Servania diin iyang gidayeg ang batan-ong Filipino boxer sa kadaugan niini.
Ang 35-anyos nga si Garcia (38-9, 22KOs) kinsa kapila miaway alang sa world title giingon nga gidagit sa pipila ka wala mailhing armadong lalaki sa wala pa makit-i ang iyang patay'ng lawas duol sa usa ka sapa didto sa Mexico diin aduna kini lima ka samad pinusilan sa ulo.
- Latest
