Accenture 2-0 na's E-League
CEBU, Philippines - Gilupig sa Accenture Sharks ang Sykes Pioneer, 74-68 alang sa ilang ikaduhang sunod-sunod nga daog sa 9th CSCC E-League Basketball Tournament didto sa City Sports Club-Cebu gym sa Cebu Business Park.
Si Archie Brian Vincent Batua mikabya og 24 puntos uban ang pito ka rebounds, si Ryan Edward Llanos mihabwa og 12 puntos ug si Ildefonso Bulangis Jr. mikimada og 11 puntos alang sa Accenture nga nagsolo karon sa liderato sa bracket-B sa Southern Conference uban ang 2-0 win-loss record.
Sila si Frederick Montelibano ug Jan O'Neil Sahilan mikadlit og 21 ug 14 puntos matag usa, apan wala kini makapadaog sa Sykes, kinsa nakatilaw sa ilang unang pilde niini nga season.
Sa laing bahin, si Brennan Gonzales mikabkab og 15 puntos, samtang si Jose Rodelo Carabio mikubkob og 10 puntos alang sa Wipro Tigers nga milubong sa two-time champion Telstra-Teletech Titans, 76-60.
Human milabaw og tres puntos sa halftime, 37-34, ang Tigers milusad og 19-11 run sa ikatulong kuwarter aron inaton ang bentaha, 58-45 paingon sa final period.
Si Clifford Amarado mirehistro og season-high 31 puntos, apan dili kini igo sa pagpadaog sa Telstra-Teletech, kinsa nakatilaw sa ilang sunod-sunod nga kapildihan.
Sa lain pang duwa, ang Calltek Trojans midaog sab batok sa Author Solutions Hardbacks (kanhi Xlibris Publishers), 57-52.
Upat ka players ang miiskor og double figures alang sa Calltek nga gipangulohan ni Aerl Genebraldo, kinsa mibahog og 13 puntos. Sila si Christian Judilla ug Jan Pierre Gellez miamot og 12 puntos matag usa. Gisundan ni Mark Louise Gellez nga mitampo'g 10 puntos. Si Martin Ian Pe Guzman mao lang ang bugtong player nga mihimo'g double figures uban ang 10 puntos alang sa Hardbacks, kinsa pabiling walay daog sud sa duha ka duwa.
- Latest
