Knockout tuyo ni Sabillo
CEBU, Philippines - Ipakita ni WBO minimumweight champion Merlito 'Tiger' Sabillo (21-0, 11KOs) ang iyang kabangis aron mohimo'g impresibong kadaugan sa pagdepensa niya sa iyang bakus batok ni Colombian challenger Jorle Jacinto Estrada (16-6, 5KOs) sa main event sa "Pinoy Pride XXI: When Worlds Collide" sa Hulyo 13 didto sa Solaire Casino and Leisure Park sa Pasay City.
Kini ang labing unang title defense ni Sabillo sa bakus nga iyang nasakmit niadtong Marso 9 pinaagi sa pagtumba sa Colombian nga si Luis De La Rosa didto sa Coliseo San Vicente sa Colombia.
"Nalipay ko ug excited kay anhi nako depensaan akong bakus sa Pilipinas," matud pa ni Sabillo, ang ikaduhang world champion karon nga gikan sa ALA Boxing Gym sunod ni WBO light flyweight king Donnie 'Ahas' Nietes.
"Grabe akong ensayo karon kay gusto ko nga hatagan sila (Filipino fans) og nindot nga kadaugan. Kutob sa akong makaya ako siya (Estrada) nga tumbahon."
Si ALA Promotions President ug CEO Michael Aldeguer naghinam-hinam na usab alang ni Sabillo, kinsa mopakita sa iyang abilidad atubangan sa Pinoy boxing fans.
"He is one of our remaining Filipino world champions right now and he has the ability to bring a new dimension in fighting. Merlito is an exciting fighter and he has the style that boxing fans want to watch," matud pa ni Aldeguer atol sa press conference kagahapon didto sa St. Mark's Hotel.
Sa supporting main event, si undefeated Arthur 'El Matador' Villanueva (21-0, 11KOs) mosuway pag-ilog sa WBO Asia Pacific super flyweight title batok ni Mexican Arturo 'Fuerte' Badillo (21-4, 19KOs).
Ang kanhi world title challenger nga si AJ 'Bazooka' Banal (28-2, 20KOs) mohimo sa iyang "comeback fight" batok ni Mexican Abraham 'Cholo' Gomez (18-7, 9KOs). (BANAT BALITA)
- Latest
