Dapudong bag-ong world champion
CEBU, Philippines - Natuman ang damgo ni Edrin “The Sting†Dapudong nga mahimong world champion human niya gipakatug sa first round ang South African champion nga si Gideon Buthelezi aron masakmit ang IBO bantamweight title kagahapon didto sa Emperor’s Palace Resort and Casino sa Johannesburg, South Africa.
Sa report sa Philboxing.com, usa ka bangis nga left hook ang gipatugpa ni Dapudong ngadto sa suwang sa South African kinsa daling nalup-og ug wala na kabarug sa 2:29 sa first round.
Si Buthelezi kinsa maoy midaog sa una nilang sangka niadtong Nobiyembre pinaagi sa split decision mipakita og kompyansa pinaagi sa kanunay nga pag-ubos sa iyang depensa rasun nga nakapasud sa iyang kumo si Dapudong.
Si Dapudong kinsa miaway kaniadto alang sa WBA flyweight title apan napilde ni Mexican Hernan Marquez mipalambo sa iyang record ngadto sa 28-5, 17KOs, samtang si Buthelezi nakahiagum sa iyang ikatulong pilde sud sa 17 niya ka away.
Ang kadaugan ni Dapudong maoy miputol sa sunod-sunod nga kapildehan sa mga kanhi world champions sa nasud sama nila ni Manny Pacquiao, Nonito Donaire ug Brian Viloria. (BANAT PALARO)
- Latest
