Lisud tag-anon

 CEBU, Philippines - Game-1  karon sa "best-of-seven" NBA Finals tali sa defending champion Miami Heat ug San Antonio Spurs.

 Bisan pa’g atong tugotan nga modaog dayon ang Heat sa Game-1, dili kini garantiya nga mo-champion. Kun sila gihapon modaog sa Game-2 dili gihapon segurado nga sila'y mosakmit sa titulo.

 Sa Game-3  na makita ang katag diin ang Spurs na sab maoy mo-host hangtod sa Game-5. Kun ang Heat gihapon maoy modaog, mo-surrender na ang Spurs kay wala pa man mahitabo nga adunay team nga biya og 0-3  midaog sa series.

 Niadtong mga hilig mopusta sa duwa, ania ang mga butang nga angayan ninyong hataga'g konsiderasyon.

 Unahon nato ang gitawag og numerology. Matag higayon nga miabante sila sa NBA Finals diin upat na ka singsing ang ilang gisul-ob, pulos bungkig nga tuig ang nadag-an sa Spurs -1999 batok New Jersey (4-1), 2003 batok New Jersey (4-2), 2005  batok Detroit (4-3) ug 2007 batok Cleveland (4-0). Karon, ang 2013 bungkig nga tuig.

 Ari sab kita sa numerology sa habig sa Heat. Game-1 karon ug Hunyo 6 sa America.

 Ang Hunyo ikaunom nga buwan sa tuig. Di ba mao man sab kini ang numero ni LeBron James?

 Posibleng matinuod ang prediction sa mga NBA analysts sa Yahoo nga ang Heat maoy modaug sa korona sa Game-6 ug matapos ang series sa 4-2. Sumadahon, mao kini ang jersey number ni James.

 Di ba unom na man kadto ka tuig ang milabay nga nag-abot ang Spurs ug si James sa finals? Hinuon, didto pa siya magduwa sa Cleveland.

 Gikan sa numerology molabang ta sa laing regla ug kini akong basihan sa akong nabasahan sa internet  pipila na ka tuig ang milabay ug kini mao ang makapahimuot  kay kuno ang team nga maoy mas una sa letra sa alphabet, mao kuno'y moguwang mananaog.

 Nauso kini sa panahon sa Chicago Bulls dihang ilang giharos ang ilang siyam ka titulo matag abante nila sa finals.

 Sugdon nato sa primero - 1991 Chicago vs. L.A. Lakers, (4-1), 1992 Chicago vs. Portland (4-2), 1993 Chicago vs. Phoenix (4-2), 1996 Chicago vs. Seattle (4-2), 1997 Chicago vs. Utah (4-2) ug 1998 Chicago vs. Utah (-4-2). Di ba ang letrang "C" mas nauna? sa ilang unom ka korona, Lakers ang maoy medyo nadehado sa 4-1 tungod kay ang lima pulos naka 4-2. Unom  gihapon ka duwa ug ambot unsay tangil aning numero ni James.

 Bisan gani niadtong 1994 ug 1995 diin naka-back-to-back ang Houston Rockets, mas una ang letra sa alphabet batok sa teams nga ilang gipilde -- Houston vs. New York ug Houston vs. Orlando.

 Kinsa may nalimot sa Dallas vs. Miami niadtong 2011? di ba midaog ang Dallas nga mas una sa alphabet. Sa miaging tuig, Miami vs. Oklahoma? Di ba mas una sa alphabet ang letrang "M"?

 Dili hinuon kini maoy bugtong sukaranan kay kadaghan sab mahitabo nga bisan ug uwahi ang letra sa alphabet modaog lang gihapon ug usa niini ka ehemplo ang mga kadaugan sa Lakers batok Boston. Natinuod lang kini matag daog sa Boston batok Lakers kay lagi mas una man ang letrang "B" kaysa letrang "L".

 Ako mismo makaingon nga dili kini mahitabo sa tanang panahon.