Unsay tanghaga sa No. 6?

CEBU, Philippines -  Game-7. Kung dinhi pa kini sa ato nga matanga sa series, mao kini ang gitawag og "promoter’s dream" kay dinhi makabawi ang mga sponsors ug promoters. Dinhi sab halos dili mamilok ang mga fans mga mosaksi sa duwa.

 Wala’y lalis, maanindot gyud kining duwaa karon ug mao kini makapasamot kasikat sa NBA sa tibuok

kalibotan.

 Okey ato lang sabton daan nga daku’g purohan nga ang Miami Heat gyud maoy modaog. Ilaha ang

homecourt, ilaha ang fans, ilaha ang championship experience, ilaha ang tanang hinagiban ilabi na ang ilang kabangis gikan sa three-point territory. 

 Garbo ang nakataya sa Heat ug mao kini ang ilang paningkamotan nga dili sila mapukan didto mismo sa ilang nataran. Ug labaw nang garbo maoy maangkon karon sa Indiana Pacers kun ilang hitaghapan ang Heat kay mahimutang kini sa kasaysayan isip usa sa labing dakung upset sa playoffs.

 Wala tingali molalis kanako kun moingon ako nga bisan ang mga fans sa Heat bation sab karon og kakulba.

Mas lig-on man tuod sila kun itandi sa Pacers,  apan si Nostradamus lang tingali maoy makatag-an sa resulta sa Game-7 karon.

 Atong lakbitan sa pagpahinumdom ang atong mga suki sa Banat Sports nga sa miaging tuig, napilde ang Pacers sa second round sa playoffs batok sa Heat ug natapos ang series sa 4-2. Dihang maoy kampiyon ang Heat sa 2006 batok Dallas Mavericks, nahuman ang series sa 4-2. Ug dihang midaog sab ang Dallas sa 2011 finals batok Miami, 4-2 sab gihapon nahuman ang series.

 Ambot unsa’y tanghaga o “magic” niining numero  6. Dili ba 4 ug 2 mahimong sayes ug mao man kana ang jersey number ni LeBron James? Ang Game-6 sa series nakuha sa Indiana busa ilang nasumpo ang regla.

 Karon kay milusot man sila sa hamok sa “No. 6” unsa man kahay anting-anting sa Indiana nga miabot na man kini’g Game-7.  Wala pa hinuon si James sa Miami niadtong tungora  kay didto pa siya sa Cleveland Cavaliers 2006. Si James mitapon sa Miami niadto pang  2010. Samtang miabante ang Cavaliers sa 2007 finals, naharos sila sa San Antonio Spurs, apan 23 pa ang numero ni James.

 Iyang gisalikway ang No. 23 tungod kuno sa iyang pagrespeto kang Michael Jordan ug si Air Jordan ra

kuno’y angayan mogamit niadtong numeroha.

 Karon 2013. 2+1+3=6. James imo kaha kining swerte o kini na maoy panahon sa P-A-C-E-R-S nga may

unom sab ka letra.

 Ang Finals gikatakda sa Hunyo 6. Ang Hunyo mao sab ang ika-unom nga buwan sa tuig. Mao kini ang

gitawag og "numerology." (BANAT PALARO)