Freeman-CDN, GMA-7 gisugat og daog
CEBU, Philippines - Gilihian dayun og daog ang The Freeman-Cebu Daily News Red Shamans human nila gidabo-dabohan ang ABS-CBN Squad, 79-43, sa opening game sa Newsmen Basketball Association of Cebu (NBAC) 2013 Season kagahapon didto sa Chiang Kai Shek gymnasium of the Cebu Eastern College (CEC).
Usa ka balanse nga atake ang gigamit sa Red Shamans sa pagpangulo nila ni Manny Villaruel ug Peter Romanillos nga nagkumboya og 41 puntos sa maong kadaugan.
Mibunga usab ang paningkamot nila ni Lemuel Maglinte, Calvin Cordova, Edwin Melecio, Jonjie Mendoza ug Ador Mayol nga pulos mipuntos og sayes puntos matag usa ug aron usab libogon pa ang nagkabuang nga depensa sa ABS-CBN.
Miburot pa ngadto sa 24 puntos ang labaw sa The Freeman- CDN sa second half, 54-30, og dinhing higayuna miatake na ang mga second stringers sa koponan nga mao sila si Dale Rosal, Ador Mayol ug Tito Tan alang sa 19 puntos nga kadaugan sa katapusang tingog sa buzzer.
Si Edgar Escalante maoy nangulo sa ABS-CBN sa iyang 18 points gisundan ni Roel Navarro nga adunay 11 puntos.
Sa sayu pa, gilubong usab sa defending champion GMA-7 ang CCTN 47, 61-52. Si Godfrey Rellin mibugha og 20 puntos aron pangulohan ang GMA-7, samtang si Jovel Obiso ug Rodel Quimod maoy namuntos sa CCTN sa ilang 18 puntos matag usa. (BANAT PALARO)
- Latest
