Mga estudyante sa Yaw-Yan magpasikat karung gabii

CEBU, Philippines - Mahitabo karong gabii ang ‘culminating ceremony’ isip timaan sa pagtak-op sa summer clinic sa Yaw-Yan ArDigma Martial Arts Federation diha sa Yaw-Yan Headquarters sa 4th floor sa Coast Pacific Downtown Center sa Sanciangko Street, ning syudad.

Ang maong seremonyas sugdan sa usa ka misa sa alas-5 sa hapon sa dili pa ang demonstration sa mga batan-ong tinun-an sa Yaw-Yan sa alas-6 sa gabii.

Si Yaw-Yan ArDigma CEO/Founder ug Vis-Min director Master Benigno “Ekin” R. Caniga, Jr. nagkanayon nga ipakita sa mga tinun-an ang nakat-onan nilang mga abilidad sud sa usa ka buwan nga summer clinic sama sa arnis, Aryan Style/Sipang Pamalo, Bo-Staff, Tonfa/Baton, Yawara Stick, Yaw-Yan Combat (self-defense), Yaw-Yan ArDigma System, Mixed Martial Arts (MMA), ‘Bigayan’ ug full-contact sparring.

Dugang pa ni Master Ekin nga dinapit nga guest speaker mao ang Turkish nga si  Yilmaz Karadeniz, usa ka Yaw-Yan ArDigma practitioner ug master instructor sa arnis.

Gikan sa pulong nga "Sayaw ng Kamatayan" (Dance of Death), ang Yaw-Yan nailhan isip usa sa mga orihinal nga Filipino martial arts nga gimugna ni Grand Master Napoleon 'Nap' A. Fernandez.  Ang maong matang sa martial arts unang gitudlo niadtong 1972 didto sa Sta. Cruz, Manila. (BANAT NEWS)