USC, SHS-Ateneo ug Iloilo daug

CEBU, Philippines - Pulos mikulit og managlahing kadaugan ang University of San Carlos, Sacred Heart School-Ateneo de Cebu ug Ateneo de Iloilo basketball teams atol sa opening day sa CYBL VISMIN Goodwill Games 2013 didto sa SHS-Ateneo de Cebu Gym, Canduman Campus didto sa dakbayan sa  Mandaue. 

Midaug ang USC batok sa University of the Visayas (UV), 51-47 sa Small Basketeers Philippines (SBP) division game, samtang ang ilang counterparts sa Passerelle division, midaug sab batok sa University of San Jose Recoletos (USJR), 104-47.

Wala sab magpalupig ang SHS-Ateneo de Cebu kinsa mikulit og duha ka daug sa SBP human ilang gipukan ang NOODA Warriors gikan sa Bacolod, 58-38.

Ang Passerelle team sa SHS-Ateneo de Cebu midaug sab batok sa Cebu Eastern College, 52-40.

Sa laing duwa, midaug ang Ateneo de Iloilo (AdI) batok sa St. Benedict’s Child Learning Center, 52-31 sa SBP division ug ang AdI Passerelle team naka-ipsot batok sa St. John’s Institute (SJI) sa Bacolod, 44-33.

Sa lain pa gyung duwa ubos sa SBP division, midaug ang SJI sa Bacolod batok sa CEC, 42-40, samtang gilubong sa Don Bosco ang USJR, 34-19.

Sa Passerelle division,  gilubong sa Don Bosco-A ang ilang sister team ang Don Bosco-B, 49-28.

  Ang special guest sa opening ceremony mao ang American skills coach nga si Ryan Goodson kinsa mipakita sa iyang abilidad sa ball-handling drills ug iyang giawhag ang mga batan-ong players sa pag-isip sa duwang basketball nga usa ka matang sa lingaw-lingaw ug mangita'g paagi aron moasenso ang ilang abilidad. (Gabby G. Malagar)

Bulldogs mihambat sa Nolbes

Milampos ang Team Bulldogs sa pagsakmit sa kampiyonato sa season-opening conference sa 2013 Los Amigos Basketball Association (LABA) tournament human nila gikulata ang Nolbes, 98-84, didto sa Banilad Sports Complex.

Si Gilbert Sebandal ug Richard Jordan mipuntos og 12 puntos matag usa aron pangulohan ang Bulldogs ngadto sa usa ka dominanteng kadaugan. Sayung nakontrolar sa Bulldogs ang duwa ug miabot og 14 puntos ang ilang labing dakung labaw.

Ang team owner sa Nolbes nga si Arnold Pestaño maoy nangulo sa iyang koponan sa iyang 12 puntos.

Si LABA President Cris Ubas mao ang personal nga mihatag sa tropeyo sa Team Bulldogs uban ang iyang duha ka vice-presidents nga sila si Lou Ornopia ug Sebandal. Ang sunod conference sa LABA mahitabo sa Hulyo.

puntos matag usa:

Bulldogs (98) - Sebandal 12, Jordan 12, Ocier 12, Monsanto 11, Ramos 10, Bercede 6, Jacalan 6, Anghay 6, Pon 5, Alburo 5, Niez 5, Tijero 4, Migallen 4

Nolbes (84) - A. Pestaño 12, Yamomo 10, Rabanal 10, Buhian 8, Cardoza 8, J-Bart 7, Tantuan 6, Oljol 6, D. Pestaño 5, Bayate 4, Auman 4, Balo 2, Angga 2 (PR)(BANAT NEWS)