Spurs VS. Grizzlies Karon, Miami vs. Indiana sa East

CEBU, Philippines - Sugdan karon ang Game 1 sa Western Conference Finals tali sa San Antonio Spurs batok sa Memphis Grizzlies didto sa AT&T Center sa San Antonio, Texas.

Miabante ang Spurs human ilang gipukan ang Golden State Warriors samtang unang miabante sa West Finals ang Memphis Grizzliers dihang ilang na-upset ang defending West champions Oklahoma City Thunder sulod lang sa game 5.

Kagahapon, depensa maoy yawe sa kadaugan sa Indiana Pacers batok sa New York Knicks sa iskor, 106-99 diin ilang gitapos ang ilang best-of-seven series sa East semifinals sa 4-2 nga baraha.

Miabante sa East finals ang Pacers sa labing unang higayon sukad niadtong 2004 apan napilde sila sa L.A. Lakers.

Natapalan ni Roy Hibbert si Carmelo Anthony nga buot untang mohansak nga maoy nagduslit og 11-2 run sa fourth quarter.

Ang taga New York nga si Lance Stephenson mibahug og nuybe puntos sa maong rally ug mitapos sa duwa sa iyang playoff career-high 25 puntos.

''That's why they pay me the big bucks this summer, so I have to protect the paint,'' matod pa ni Hibbert kinsa bag-o lang mipirma og $58 million contract. Mipadayon pag-ingon si Hibert "If all else fails, meaning the offense, I have to protect the paint.''

Human molusot batok Knicks, ang syagit karon sa mga fans sa Pacers mao ang  ''Beat The Heat!''

Alang sa Pacers, maigo kini'g usa ka postseason rematch batok sa NBA defending champions nga maoy nagpalagpot kanila sa miaging tuig human sila maka-una sa serye, 2-1 sa ilang best-of-seven semifinals.  Gitapos sa  Heat ang series sa Game 4 didto sa  Indiana ug laing duha ka daog ang gihimo sa Heat human mapiang si Danny Granger sa iyang tuhod.

Naleksyon na karon ang Indiana sa ilang pagbalik sa Miyerkules didto sa  South Florida alang sa Game 1 sa East Finals.

Nakasinati na sab ang New York og laing subpar nga  shooting diin igo lang silang nakahimo'g  40 por siento ug nalupig pa gyud sila sa Pacers sa rebound, 36-43.  Sa ilawom, na-outscore sab ang   New York, 20-52 ug si Anthony kinsa maoy nangu sa iyang 39 puntos, igo lang nakahimo'g kuwatro puntos sa kataposang 12 minutos sa duwa sa iyang  2 of 7  nga field shooting.

Si Iman Shumpert midugang og 19 puntos alang sa Knicks diin ang lima niini mga three-point shots ug si J.R. Smith mihimo'g 15 puntos.  (BANAT PALARO)