Playoff sa Partner's Cup

CEBU, Philippines -  Magtigi karon ang Cebu Landmasters/USC Warriors ug ang San Marino Tuna/CIT-U Wildcats sa playoff aron pagdeterminar sa No. 3 qualifiers sa Enervon CESAFI Partner's Cup 2013 basketball tournament  didto sa Cebu  Coliseum.

 Ang duwa gikatakdang sugdan sa alas-4 sa hapon.

 Ang Cebu Landmasters ug ang San Marino Tuna mitapos sa double round elimination sa managsamang 5-5 win-loss records ug   segun sa nalatid nga lagda sa Partner’s Cup, adunay playoffs nga himuon  aron buakon ang panagtabla.

 Bisan unsa pay resulta sa ilang duwa karon, ang duha segurado nang nakaangkon og "twice-to-beat" advantage sa quarterfinals nga sugdan karong Sabado.

 Ang modaog karon sa ilang duwa maoy makigsangka   sa No. 6 Raphael’s Café/USJ-R Jaguars, samtang ang mapilde maoy makigbugno sa fifth-ranked Lion Tiger/USPF Panthers.

 Mas nakapabor og gamay ang Cebu Landmasters ni coach Julian Macoy tungod kay aduna  sila'y 6-foot-5   Cameroonian recruit nga si Ahmed Salihou, apan wala pay seguro nga moduwa ang ilang starting center nga si Garrick Ayala. Mosandig sab sila nilang Nico Magat, Ian Ortega, Stephen Que ug Charles Pepito ug uban pa, samtang ang San Marino Tuna ni coach Gilbert Demape makasalig sab nilang Joshua dela Cerna, Vincent Menguito, Alan Dimco, Floyd Taboada ug Franklyn Batiquin. (BANAT NEWS)