Mayweather Sr. way bilib ni Alvarez

Di kumbinsido si American trainer ug amahan ni undefeated champion Floyd Mayweather Jr. nga si Floyd Sr. sa abilidad ni light middleweight king Saul Alvarez.

Si Alvarez maoy giisip nga labing nindot nga ikasangka sunod ni Mayweather, apan ang amahan ni Floyd nagtuo nga layu ra kaayo kini sa abilidad sa No.1 pound-for-pound king. (LPM)

MMA sa Pinas mulambo

Daku ang salig ni Mixed Martial Arts (MMA) pioneer Alvin Aguilar nga musulbong pa ang sports nga MMA dinhi sa nasud ug moabot ang panahon nga kita ang maghari sa Asya.

Si Aguilar kinsa maoy founder sa Universal Reality Combat Championship (URCC) diin produkto ang mga MMA Asian superstars sama nila ni Eduard Folayang ug Eric Kelly. (LPM)

Darchinyan vs Rigondeaux

Ang kanhi Armenian champion nga si Vic Darchinyan maoy nakaangkon sa katungod nga sunod moaway ni WBO/WBA super bantamweight champion Guillermo Rigondeaux karong tuiga.

Kini human midaog si Darchinyan sa iyang ‘comeback’ fight batok ni Mexican Javier Gallo kinsa iyang gipaundang sa fourth round kagahapon didto sa Texas. (LPM)

Tapales moaway sa Japan

Gitakdang moaway ngadto sa nasud sa Japan ang Cebuano boxing prospect nga si Marlon Tapales sa Rex ‘Wakee’ Salud Promotion batok sa wala pa hinganli nga Thai boxer sa usa ka 10-round non-title bout karong Mayo 26.

Uban ni Tapales nga moaway didto sa Japan mao si Mark Gil Melligen, manghud ni kanhi light middleweight contender Mark Jason Melligen, batok ni Indonesian James Mokoginta. - LPM