SCH kampyon sa UBCA

CEBU, Philippines - Naka-eskapo ang San Carlos Heights (SCH) five nga gipangulohan ni Yoli Meso batok sa Grace Bostolits ni team owner Grace Petiluna dihang mikulit sila'g kulbahinam nga 92-90 nga kadaugan kaniadtong Martes sa gabii pinaagi sa buzzer-beating three-pointer ni Rowell Juban aron sakmiton ang korona sa Upper Bayanihan Catholic Association (UBCA) 2013 second season basketball tournament didto sa barangay Quiot Sports Complex, ning dakbayan.

Miposte's labing menos 13 puntos nga labaw ang SCH dribblers atol sa halftime, 52-39 gikan sa ilang sikit nga 26-20 labaw sa first period. Silang Barak Ecojedo ug Yok-yok Alesna maoy nagtimon sa opensa sa second quarter aron inaton ang ilang labaw ug wala kapugngi ang kainit ni ex-SIT Skyblazer Jun Sumargo kinsa mibahug og 19 puntos sa second quarter.

Mi-rally ang defending champion nga Grace Bostolits  didto sa third period ug misukli sila'g 26-15 scoring run nga gipasiugdahan nilang Jeff Francisco ug Toly Petiluna aron mosikit ngadto na lang sa dos puntos nga biya, 65-67 aron taposon ang third period.

Sikit ang kinatibuk-ang fourth period ug ang triple ni Petiluna sa kataposang 2.9 segundos maoy naghatag sa Grace Bostolits ug 90-89 nga bentaha ug naglawig na unta sila ngadto sa kampyonato apan atol sa inbound sa SCH, wala hibantayi ang kalit kaayong assist ni Barak Ecojedo ngadto kang Juban kinsa mipataroy sa iyang winning triple gikan sa midcourt ug igo gyud mihuni ang buzzer alang sa usa ka cardiac-finish sa iskor, 92-90.

Mibahug og 32 puntos si Sumargo aron pangulohan ang SCH samtang midugang og 14 puntos si Juban lakip ang winning triple.

Ang Grace Bostolits sa laing bahin, gipangulohan ni Petiluna kinsa miposa og 15 puntos nga pulos gikan sa three-point arc ug si Francisco miamot og 13 puntos.

Sa sayo pa, midaug ang Mariquit Aqua Ventures (MAV) batok sa RCAF aron ma-angkon ang ikatulong pwesto, 92-86. Silang Predan Caballero ug Robert Abasolo maoy nangu sa MAV sa ilang 21 ug 16 puntos, matag usa. 

Si Boy Ramirez mihakot sab og 21 puntos aron pangulohan ang RCAF samtang miamot og 15 puntos si Marlon Villantes. (BANAT NEWS)