Team Lancers pabiling kampyon

CEBU, Philippines - Milampos pagdepensa sa ilang korona ang Team Lancers kinsa midominar sa ilang sangka batok sa bisita gikan sa Ateneo de Iloilo pinaagi sa pagdemolis sa nahisgotang kaatbang sa iskor 71-47 atol sa Coke PBA Youngstars 2013 Visayas Regional Finals kaniadtong Sabado didto sa Capitol Parish Gym sa dan Escario, ning dakbayan.

Sayo kaayong gilubong sa Lancers ang Ateneo de Iloilo sa opening quarter, 24-9 dihang nagpauwan og three-points shots ang ilang mga guards nga silang Jun Kent Manzo ug Orlan Wamar ug nakakuha sab sila'g suporta gikan kang Joshua Flores kinsa mibahug og 12 puntos sa second perios lakip ang duha ka triples aron inaton ang labaw sa Team Lancers sa halftime, 42-25.

Miabot og labing menos 20 puntos ang abante sa Team Lancers ni coach Jay Mar Canoy didto sa third quarter, 54-34 ug walay nahimo ang Iloilo aron pugngan ang grabeng kainit sa opensa sa host team.

Ang bugtong naghatag og paglaum ug kahayag sa opensa sa Ateneo de Iloilo ni coach Jophil Cercado mao ang hot-shooting nga si Miguel Sasuman kinsa maoy nagtimon sa ilang opensa pinaagi sa iyang 25 puntos diin upat niini ang three-pointers.

Si Flores maoy nangu sa Team Lancers sa iyang 25 puntos samtang sila si Manzo ug Wamar midugang og 15 ug 12 puntos, matag usa.

Ang Ateneo de Iloilo gipangulohan ni Sasuman kinsa mibahug sab og 25 puntos apan bugtong siya lang maoy naka-iskor og double figures sa ilang team.

Sa sayo pa, miyukbo sab ang Ateneo de Iloilo ngadto sa West Negros University sa Bacolod, 43-50. Ang WNU maoy naka-angkon sa ikaduhang pwesto.

Ang Team Lancers kinsa maoy midaug sa unang duha ka edisyon sa maong torneyo dinhi sa Cebu ug sa Visayas legs nga gipasiugdahan sa PBA, makingsangka batok sa laing mga regional champions gikan sa nagkalain-laing dapit sa nasud lakip ang Metro Manila atol sa national finals didto sa Manila unya sa Mayo 19 nadto sa Mayo 26.

Ang Team Lancers maoy second placer atol sa national finals sa miaging tuig dihang napilde sila sa San Beda-backed Taytay (Rizal) squad.

Puntos matag usa:

Cebu/Lancers (71) – Flores 25, Manzo 15, Wamar 12, Morre 6, Balbosa 4, Silorio 4, Gonzaga 3, King 2, Oche 2.

Ateneo de Iloilo (47) – Sasuman 25, Gabriel 8, Ong 6, Guadalupe 3, Babas 2, Escarilla 2, Diaz 1. (BANAT NEWS)