Lancers batok Warriors sa Coke PBA finals

CEBU, Philippines - Ang teams Lancers ug Warriors miiskor og daog sa crossover semifinals aron maoy  magtakus sa finals sa Coca Cola PBA Youngstars Basketball Tournament 2013 Cebu Leg didto sa Sacred Heart  School gym sa Gen. Maxilom Ave., ning siyudad.

 Gilubong sa defending champion Lancers ang Easternians sa iskor nga 69-49, samtang  ang Warriors milubong sab sa Team Greywolves 70-55.

 Sayong gilubong sa Lancers ang Easternians sa iskor, 23-6 human sa first quarter, apan medyo mibahar sila sa second period nga naghatag higayon sa Easternians aron makibhangan ang labaw ngadto sa 10 puntos, 21-31.

 Nahigmata  ang Lancers  sa third period ug ila na sab nga gilubong ang Easternians, 55-39 aron mokulit sa ilang ikalimang sunod-sunod nga daog.

 Silang Joshua Flores ug Jun Kent Manzo maoy nangu sa Lancers nga adunay 15 puntos matag usa, samtang si Mark Berdera maoy nangu sa Easternians sa iyang 10 puntos.

 Sa laing duwa, ang Warriors    miagi pa og kalisud una nila mapilde ang Greywolves.

 Ang Warriors  milabaw lang og singko puntos, 14-9 paghuman sa first period sa wala pa nila inata ang labaw ngadto sa 34-17 sa halftime.

 Si Carlo Ortega maoy nangu sa Warriors sa iyang 16 puntos ug si Clint Suelto mitampo'g 15 puntos.

 Ang Greywolves gipangulohan ni Vinchenzo Ortega  sa iyang 14 puntos.