Chiongbian nangandoy modaog sa Subic Triathlon

CEBU, Philippines - Naglaum na sab ang Sugbuanong triathlete nga si Justin Chiongbian nga makapakita sa iyang katakus dihang ang penultimate qualifying race alang sa Asian Youth Games mosikad karong adlawa pinaagi sa 2013 K-Swiss Subic Bay Asian Triathlon Championships didto sa Subic Freeport.

Pangulohan ni Chiongbian ang mga malaumon nga Pinoy triathletes human sa iyang second place finish atol sa ikatulo sa lima nga hugna sa qualifying races.  Nagsunod si Jimuel Patillan sa Zambales ug Loui Lalanto sa Cagayan de Oro.

Sa pikas bahin, si Vicky Deldio sa Zambales maoy nag-una sa standings, gisundan ni Magali Echauz sa Makati ug Kate Lagman sa Cagayan.

Tuyo ni Chiongbian ug sa ubang mga sakop sa national pool mao ang pag-angkon og luna sa Youth Olympic Games sunod tuig didto sa Nanjing, China ug sa Asian Youth Games nga gikatakda sa Hulyo.

Si Chiongbian ug kaubanan gilauman makakuha'g dugang mga "tips" gikan sa labing bantugang triathletes sa kalibotan nga mopakita'g aksiyon sa Subic. Lakip  na niini ang Japanese Olympians nga si Hirokatsu Tayama, Yuichi Hosoda ug Ryosuke Yamamoto ug sila si Faiquan Bai ug Yiming Zhang sa  China.