Gikan didto sa UAAP ug NCAA, exodus sa mga imports sa CESAFI

Kaniadto sa among lugar didto sa Poro, Camotes, makakita lang ako og "black guys" kung motan-aw ako sa TV apan posible didto sa Luzon, dugay rang midagsa ang ilang mga kaliwat tungod kay kadaghanan sa gipangdestino dinhi sa Pilipinas nga mga sundalo, mga itom man hinungdan nga daghang black didto sa Subic ug sa Clark.

Apan ang pagdagsa sa mga blacks dinhi sa Pilipinas karon, tataw nga basketball gyud ang hinungdan.

Gawas lang sa mga Fil-Ams o uban pang mga Fil-foreigners nga nagduwa karon sa PBA, daghan na kaayong mga collegiate players nga nagduwa didto sa UAAP ug NCAA.

Ug ang labing tinuod, wala sab nako damha nga kining pagkatap sa mga black imports moabot ra gyud gihapon dinhi sa Sugbo ilabi na dinhi sa Cebu Schools Athletic Foundation, Inc. (CESAFI).

Una akong nailhan nga black player sa Sugbo mao si anhing Daryl Smith. Kanhi siya  PBA import ug nabihag dinhi sa Sugbo hangtod dinhi na siya mobalhin og puyo ilabi na kay nakaasawa og Cebuano nga bahu pa gani nakong paryente si Verna.

Sa panahon pa sa CAAA, duna lay mga black mestizo nga mga Filipina ang mga inahan sama pananglit kanilang Michael Dumdum ug ang mga Tate brothers sa UV nga silang Nelson ug Earl.

Didto sa UAAP, midagsa sab ang mga black players ilabi na karong mga panahona nga medyo diyutay na lang ang mga Pinoy nga tag-as ug mga dagko'g lawas busa may katarungan tingali ang mga collegiate teams didto nga mokuha sa ilang mga serbisyo aron paghatag og dugang kalig-on sa team.

Apan sa akong paniid, mas gagmay pa man hinoon og lawas ang ubang black players ug gani ang ilang mga bagtak gagmay kaayo nga mas dako pa ang akong bukton. Tingali, diha sa stamina o sa lahutay mga bentaha ang mga blacks tungod kay mas taas sila'g resistensiya ilabi na kay didto sa ilang lugar, ordinaryo lang ang kainit nga bisan kining atong panahon karon, daw sa nag-aircondition na didto sa ilaha.

Sa miaging pipila ka seasons sa UAAP, wala akoy nakita nga black players sa Ateneo ug La Salle apan aduna sa Adamson, FEU, UST, NU ug UP. Pipila kanila mao si Karem Adbul, Austin Manyara, Pipo Nonduo, Christian Sentheu, Emmanuel Mbeh ug John Mbah.

Didto sa NCAA, naa sab silang Sam Ekwe, Sudan Daniel, Ola Adeogun ug John Forrester.

Apan magpabentaha ba ang taga Sugbo? Unang mikuha og foreign import ang SWU Cobras nga silang Justin Aboude ug Benoit Mbala ug misunod sab dayon ang UV Lancers kinsa adunay Steve Cedrick Akomo ug Mike Nzenssue.

Karon sa bag-o lang gisugdan nga Enervon CESAFI Partner's Cup 2013 7th season, duna na sa'y black ang USC nga si Ahmed Salihou ug ang laing bag-o anaa sa UC nga mao si Noah Arnold. Ang wala'y black players diha karon sa Partner's Cup mao ang USPF, CIT-U ug Raphael's Cafe.

Sa akong tan-aw, wala man tingali dili mahimo sa mga local players nga mahimo sa mga black gawas lang sa ilang pagka-angayan o "fashionable" mohansak tungod sab sa katag-as sa ilang kasway. Dili sab gyud nato malalis nga mas maayong tan-awon mo-dunk silang Mbala ug Akomo kung itandi nilang Gregg Slaughter ug June Mar Fajardo. Sa style lang na magdaog apan kung dunay dos puntos ang ordinaryong itsa, dos puntos lang sab ang dunk ug wala pa mahitabo sa basketball nga gihatagan og singko puntos ang labing maayong dunk.

Sa CESAFI Partner's Cup karon, ang mga black imports aduna nay Exodus o "This land is mine."