FYA ug Petracorta tabla sa 3-0

CEBU, Philippines - Nagtabla na karon sa 3-0 ang F. Llamas Youth Association (FYA) Selection ug ang Petracorta Customs Brokerage human sa ilang kadaugan niadtong Huwebes sa gabii samtang gipakuratan sa Alin Brokers ang Avenido Customs Brokers, 77-70 atol sa nagpadayong elimination round sa 2nd season sa Cebu International Port Users (CIPU) basketball tournament didto sa Sawang Calero covered court.

Midaug ang FYA Selection sa usa ka low-scoring ballgame, 57-50 batok sa wala pa'y daog nga Gonzales Brokers bisan pa og wala makaduwa silang Baeng Medalle ug Janus Abellana ug gilubong sa Petracorta Brokers ang Mac Nels Forwarders, 88-70.

Pulos wala pa gihapo'y pilde ang FYA ug Petracorta samtang mao kadto'y unang pilde sa Mac Nels kinsa midailos sa ikaduhang pwesto sa ilang 2-1 nga baraha..

Si Takloy Moral maoy nangu sa Petracorta sa iyang 18 puntos samtang ang manag-agaw nga silang Joey ug Nilo Petracorta kinsa nag-igo sab sa gawas ug nagkumboya'g 15 puntos alang sa team ni Limasawa Mayor Melchor Petracorta nga maguwang ni Nilo.

Sa primerong duwa, daghang mga bayani nga nakatampo sa kadaugan sa Alin ug usa na kanila mao ang ilang napiang nga leading scorer nga si Ryan Villomo kinsa wala makatiwas og duwa human mokamada og 19 puntos.

Wala sab magpabentaha ang team owner nga si Israel Alin kinsa mihimo'g sayis puntos gawas pa sa iyang mga krusyal nga assists diin siya maoy nagduslit og rally sa uwahing bahin sa duwa ug ang big man nga si  Rizzan Herbito miamot og nuybe puntos samtang nagkapuliki siya'g langkat og rebounds ug nagpunay og tapal sa iyang mga kontra.

Mao kadto'y unang daog sa Alin Brokers sulod sa tulo ka duwa ug dako kaayo'g ngisi si Alin tungod kay dili na gyud sila ma-bokya hangtod mahuman ang torneyo. Ang Avenido ug Gonzales Brokers pareho karong wa'y daog ug adunay 0-3 nga baraha.

Sa laing bahin, ang managsoong Tata ug Nico Laborte maoy nangu sa FYA sa ilang 16 ug 10 puntos, matag usa.

Puntos matag usa:

First Game:

Alin Brokers (77)---    Villomo 19, Estorgio 12, Barral 10, Herbito 9, Lleve 9, I. Alin 6, Laurel 6, Lobitaña 2, Desucatan 2, Baltonado 2

Avenido Brokers (70)---   Lim 23, Arevalo 14, Batoon 10, Davila 10, Cantiga 3, Avenido 3, Cabahug 2, Gayo 2, Cayanong 1.

Second Game:

Petracorta (88)— Moral 18, Cabaltera 13, Villaronza 10, Solidarios 10, J. Petracorta 8, N. Petracorta 7, Sagarino 7, Pepito 7, Cenedio 4, Cena 2, Sagario 2, Pagangpang 2.

Mac Nels (70)— Singson 17, Castillo 16, Rodriguez 10, Baldino 10, Dellosa 5, Alaan 4, Cabillada 4, Labrador 2, Guardiano 2.

    Third Game:

FYA (57)—  N. Laborte 16, T. Laborte 10, Apuya 9, N. Medalle 8, Marata 4, Gornez 4, Villarin 2, Cal 2, Bongon 2

Gonzales Brokers (50)—Almodal 19, Mompar 8, Piape 4, Poblete 3, Castro 3, Viodor 2, Aroz 2, Nilay 2, Llamedo 1.  (BANAT PALARO)