Bautista gikulata sa Mehikanong kontra
DAVAO CITY, Philippines – Posibling matapos na ang karera sa boxing ni Rey ‘Boom Boom’ Bautista (34-3, 25KOs) human siya mahubui sa iyang WBO International featherweight title batok ni Mexican Jose ‘Negro’ Ramirez (25-3, 15KOs) kinsa midaog pinaagi sa split decision atol sa main event sa ‘Pinoy Pride XIX:Mexican Invasion’ niadtong miaging gabii didto sa University of Southeastern Philippines (USEP) gym.
Wa musalir ang abilidad ni Bautista human siya nalupig sa kusug ug kapaspas sa agresibo nga si Ramirez kinsa milampos pag-knockdown kaniya sa first round.
Tungod niini ang amahan sa ALA Boxing Gym nga si Antonio ‘Bidoy’ Aldeguer nakahukom nga hingpit nang paundangon sa boxing si Bautista.
“Boom Boom is done. I will be advising him to retire,†matud pa ni Aldeguer. “He gave his best but he lost and I think it’s the right time for him to retire.â€
Si Bautista kinsa giplanohan unta nga paawayon pagbalik alang sa world title, daling gipauwanan og mga kinumo ni Ramirez kinsa migawas nga mas desidido nga mudaog.
Nakabawi ang Boholano boxer sa ikawalong round human niya maparugi si Ramirez gamit ang iyang bangis nga kombinasyon, apan mipakita sa iyang kalig-on ang Mehikano ug nakahimo kini paglungtad bisan pa sa atake ni Bautista.
Atol sa 10th round, usa ka lawom nga gisi ang nahiaguman ni Bautista sa ulo tungod sa pagsiko ni Ramirez kinsa dali ra usab nga gikuhaan og puntos ni referee Bruce McTavish.
Ang kusug nga pag-agas sa dugo sa iyang ulo nakaapekto sa konsentrasyon ni Bautista nga maoy gipahimuslan ni Ramirez aron pauwanan pa og kombinasyon ang ALA boxer.
Human sa 12 ka rounds, duha ka mga hurado ang mihatag og 114-111 ngadto ni Ramirez, samtang usa ang mipabor ni Bautista, 114-111. (BANAT PALARO)
- Latest
