San Marino midaog na sa Enervon Partner's Cup

CEBU, Philippines -  Nakatagamtan na gyud og daog ang San Marino Tuna/CIT-U Wildcats pinaagi sa pagdemolis sa Raphael's Café/USJ-R Jaguars, 80-66 sa nagpadayong Enervon CESAFI Partner's Cup kagahapon didto sa Cebu  Coliseum.

 Mipabuto og 22 puntos  si  Joshua dela Cerna ug tukma kaayo ang iyang gipakitang labok kay ang mga beteranong sila si Allan Dimco ug Vincent Menguito wala kaarte ug nagkumboya la'g 10 puntos.

 Napiang ang line-up sa Raphael's Café gumikan kay wala ang ilang kinakusgang pointguard nga si Rendell Senining ug small forward Fletcher Galvez, kinsa atua karon sa Dumaguete nga nagrepresentar sa Central Visayas sa

Palarong Pambansa.

 Ang Raphael's Café naglabaw og 11 puntos sa first period, apan miaslom ang ilang opensa nga naghatag sa San Marino og higayon pag-ilog sa labaw.

 Si Floyd Taboada, kinsa miamot og nuybe puntos ug ang sunod-sunod nga triples ni Jeffrey Taghoy maoy mihaling sa kainit sa San Marino Tuna nga hinay-hinay miinat sa ilang labaw. Si Taghoy mitimbre og sayes puntos  alang sa

unang daog sa San Marino Tuna.

 Bugtong si Kevin Cinco lang ang mihimo'g double-figures alang sa Raphael's Café sa iyang 13 puntos. (BANAT NEWS)