Prime Asia Lending laraw mokulit 3-0 sa Partner's Cup

CEBU, Philippines -  Sa ilang 2-0 win-loss record, buot sa Prime Asia Lending/UV Lancers nga mokulit sa ikatulo nilang sunod sunod nga daog dihang ilang ikasangka ang Cebu Landmasters/USC Warriors sa pagpadayon sa Enervon CESAFI Partner's Cup 2013 basketball tournament karong adlawa diha sa Cebu Coliseum.

 Ang Prime Asia ug Cebu Landmasters magtakus sa main game sa alas-5:45 sa hapon, human sa duwa tali sa Raphael's Cafe/USJ-R Jaguars ug San Marino Tuna/CIT-U Wildcats.

 Tungod sa mas bentaha nilang line-up ilabi na sa ilang duha ka Nigerian imports nga silang Steve  Cedrick Akomo ug Mike Nzenssue, ang Prime Asia maisip nga title favorite.

 Bisan pa'g wala silang Akomo ug Nzenssue, ang Prime Asia makasalig gihapon sa abilidad nilang Rhaffy Oktubre, Chris Perolino ug rookie Leonard Santillan, kinsa makatugbang sa mga higante sa Cebu Landmasters nga naglakip nilang rookie Garrick Ayala, Charles Pepito ug Mel Steven Duran.

 Ang Prime Asia kasamtangang nagsolo sa liderato uban ang 2-0 nga baraha. Ang mga batos ni coach Felix 'Donbel' Belano Jr. yano kaayong midaog sa Gaisano Capital South/UC Webmasters, 80-57 ug nasundan batok sa Lion- Tiger Katol/USPF Panthers, 88-75.

 Ang Cebu Landmasters sa ilang bahin, midaog batok sa San Marino Tuna, 71-68 apan napilde ngadto sa Gaisano Capital, 74-80.