Bautista mo-K.O. ni Ramirez sa PP XIX

CEBU, Philippines - Davao City - Krusyal nga away ang sagubangon ni WBO   International featherweight champion Rey 'Boom Boom' Bautista (34-2, 25KOs) sa iyang pakigsangka ni Mexican brawler Jose 'Negro' Ramirez (24-3, 17KOs) sa main event sa "Pinoy Pride XIX: Mexican Invasion" ugma sa gabii didto sa University of  South  Eastern Philippines (USEP) gymnasium.

 Si  ALA Promotions president Michael Aldeguer miingon nga ang dagan sa karera ni Bautista nagdepende sa resulta sa maong away. Si Bautista giplanohan nga paawayon og balik sa world title, apan kinahanglan una kini nga mopakita sa iyang katakus alang sa talagsaong kahigayonan.  "A lot is at stake for Boom Boom in this fight," matud pa ni Aldeguer atol sa final press conference kagahapon didto sa Royal Mandaya Hotel. "His career depends on the result of this fight, if he wins this then we will see, he could be fighting in a title eliminator this year in the IBF or WBO."

 Ang garbo sa Candijay Bohol nakabaton sa iyang eight-fight winning streak, ang katapusan batok ni Mexican prospect Daniel Ruiz sa miaging tuig didto sa SM Mall of Asia Arena.

 "Nangandam ko og husto ning away kay kahibalo ko nga dili siya (Ramirez) sayon nga kontra," matud pa ni Bautista. "Mangita ko og knockout pero kun moabot og 12 rounds, andam sab ko."

 Sa iyang bahin, si Ramirez daku'g respeto ni Bautista, apan nakita niya ang away nga usa ka dakung kahigayonan aron mailhan siya sa kalibotan sa boksing pinaagi sa pagpilde sa Pinoy'ng boksidor.

 "Come Saturday night I will invade Davao by defeating Bautista and after that I will invade the world as I will be a world champion," matud pa ni Ramirez.

 Ang 25-anyos nga si Ramirez gihatagan og "tips" ni Mexican champion Daniel Ponce De Leon kun unsaon pagpilde si Bautista.  Si De Leon maoy   unang boksidor nga mipilde ni Bautista pinaagi sa first round knockout niadtong tuig 2007.

Sa supporting main event, masukod usab ang abilidad ni OPBF flyweight champion Rocky 'Road Warrior' Fuentes (34-6, 20KOs) sa iyang pakigharong  ni Mexican knockout artist Juan 'Loquito' Kantun (20-3, 15KOs).

 Si Arthur Villanueva manalipod sa iyang OPBF super flyweight title batok ni Marco  Demecillo-Singwangcha, samtang si ALA prospect Mark Bernaldez masukod sa abilidad ni Arief Blader sa Indonesia.