Coke PBA Youngstars Basketball Tournament 2013 gitakda

 CEBU, Philippines - Gitakdang buksan karong Lunes ang 2013 Coca Cola PBA Youngstars Basketball Tournament  didto sa Sacred Heart School-Ateneo de Cebu Gym sa Canduman, Mandaue City.

 Napulo ka teams ang mag-ilog sa titulo alang sa Under 16, 15, 14 ug 13 age group ug ang makampiyon adunay kahigayonan nga moduwa sa national finals.

 Si Philippine Basketball Association (PBA) commissioner  Atty. Chito Salud maoy guest speaker atol sa opening ceremonies uban ni Atty. Adel Tamano sa Coca-Cola.

 Mangulo sa mga partisipante mao ang Team Lancers ug Team Warriors, ang kampiyon ug runner-up sa miaging tuig.

 Ang ubang teams naglakip sa Team Eagles, ACES, Greywolves, Jaguars, Easternians, Perfect Sports Outfit/One on One, Panthers ug usa ka team gikan sa Bohol nga mao ang Golden Dragons.

 Ang matag team  langkuban og 12 ka players uban sa tulo ka players gikan sa Under 13, 14, 15 ug 16 age groups.

 Ang Cebu leg sa Coke PBA Youngstars kabahin sa usa ka nationwide network sa mga torneyo gikan sa mga nagkalain-laing lalawigan.

 Ang Cebu champion maoy moduwa alang sa Visayas regional finals diin ilang batukan ang champions gikan sa Bacolod ug Iloilo.

 Ang Visayas champion moabante sab alang sa six-team national finals diin ilang ikasangka  ang uban pang mga regional champions gikan sa Northern Luzon, Southern Luzon, Mindanao ug ang  top two teams gikan sa National Capital Region.