Clippers 3-1 vs. Grizzlies

CEBU, Philippines - Gitapos sa Los Angeles Clippers ang ilang season series batok sa Memphis Grizzlies pinaagi sa pagkulit og 91-87 nga kadaugan kagahapon didto sa FedEx Forum sa Memphis, Tennessee.

Nakapasulod sa iyang free throw si Chris Paul sa nahibiling 18.3 segundos sa duwa nga maoy nagselyado sa ilang kadaugan batok sa Grizzlies nga maoy posible nilang ikabagat atol sa first-round sa playoffs.

Ang maong kadaugan naghatag sa Clippers og 3-1 nga bentaha nga posible sab maoy maghatag kanila'g tiebreaker alang sa homecourt advantage atol sa postseason bisan pa man tuod og nagtabla pa silang duha sa kasamtangan sa parehong 54-26 nga baraha.

Naghatag sab kini sa Clippers og duwa sa tunga nga biya sa Denver alang sa ikatulong pwesto sa Western Conference.

Si DeAndre Jordan maoy nangu sa Clippers sa iyang 16 puntos samtang midugang si Paul og 13 puntos. Silang Blake Griffin ug Willie Green miamot og 12 ug 10 puntos, matag usa.

Si Marc Gasol maoy nangu sa Grizzlies sa iyang 18 puntos uban sa 15 ka rebounds ug pito ka assists. Midugang og 16 puntos si Zach Randolph uban sa 12 ka rebounds ug silang Tayshaun Prince ug Mike Conley miposa og 13 ug 12 puntos, matag usa.

Sa laing duwa, pormal  nang nakuha sa Boston ang ikapitong pwesto sa East human ilang gimakmak ang Orlando, 120-88, midaug ang Minnesota batok Phoenix, 105-93 ug midaug ang Charlotte batok sa Milwaukee, 95-85.