Rigo handa nang pabagsakin si Donaire

MANILA, Philippines - Handa na ang WBA super bantamweight champion Guillermo Rigondeaux na alisan na ng kinang ang makulay na boxing career ni WBO champion Nonito Donaire Jr.

Pormal na tinanggap ni Donaire ang Fighter of the Year mula sa Boxing Writers’ Association of America (BWAA) noong Huwebes ng gabi para kilalanin ang husay ng boksingero sa 2012.

Dapat naman na namnamin ni Donaire ang tamis ng parangal dahil mapapalitan ito ng pait dahil sa napipintong panalo ni Rigondeaux sa kanilang unification title fight sa Sabado (Linggo sa Pilipinas) sa Radio City sa New York.

“A victory over Nonito would show the world that I can compete against the best in the world in a professional capacity. Beating Nonito would be beating the best in the division, wika ni Rigondeaux.

Isang two-time Olympian at nanalo ng ginto noong 2000 sa Sydney at 2004 sa Athens sa bantamweight divisions, si Rigondeaux ay hindi pa rin natatalo sa 11 professional fights at may 8 knockouts.

Pero hindi siya binibigyan ng pagpapahalaga ng mga mahihilig sa boxing dahil hindi pa siya nakakaharap ng mabigat na katunggali tulad ni Donaire.

Ang bagay na ito ang dagdag hamon sa kanya at handa umano niyang alisin ito sa isipan ng mga tao.

“I believe that I belong at this level and if I’m going to be the best. I believe you’ve got to beat the best. I’m going to give it my all,” pa dagdag ni Rigondeaux.

Handa naman si Donaire na harapin ang pinakamabangis na porma ng Cubano.

Ang kanyang malawak na karanasan ang siyang magiging bentahe niya para masungkit ang WBA title.

“My experience will come in handy in terms of pushing through and going all-out and going more rounds. I think that is going to be a big factor when it comes down to we are evenly matched, “wika ni Donaire.

Muling magkikita ang dalawang magtatagisan sa weigh-in ngayon at bukas ay aktuwal na nilang maipapakita kung sino ang tunay na mas mahusay.